Kide Kooperatiba: Lea-Artibaiko erreferente, 50 urtez
Gaur [urriak 3] egin dute 50. urteurreneko ekitaldi instituzionala Berriatuko egoitzan, bertan izan dira Imanol Pradales Lehendakaria eta Elixabete Etxanobe Ahaldun Nagusia, besteak beste. Bihar [urriak 4] kooperatibako Familien Eguna egingo dute.
Ezkerretik eskuinera: Alkorta, Gojenola, Bengoetxea, Pradales, Etxenobe, Rodriguez eta Lopez. 50 urte ez dira egunero betetzen. Mende erdi ospatzea hitz potoloak dira. Kide Kooperatibak 50 urte edo mende erdi bete ditu aurten. Urte osoan zehar askotariko ekintzak antolatu eta hauspotu baditu ere, urtebetetze jaialdia egunotan daukate. Gaur [urriak 3] ekitaldi instituzionala izan dute Berriatuko egoitzan. Bihar [urriak 4] kooperatibako Familien Eguna egingo dute.
Bertan izan dira gaurkoan, besteak beste, Imanol Pradales Lehendakaria, Elixabete Etxanobe Bizkaiko Ahaldun nagusia, Ainara Basurko Promozio Ekonomikoko diputatua; Peio Rodrigez Mondragon Korporazioko presidentea, Joseba Gojenola Berriatuko alkatea edota Urtza Alkorta Ondarroako alkatea. Hain zuzen ere, Agustin Goikoetxea Kideko Lehendakariak eta Mario Lopez Kideko zuzendari nagusiak egin diete guztiei harrera. Gero, Berriatuko egoitzan barrena bisita gidatua osatuz, kooperatibaren inguruko nondik norakoak azaldu dizkiete. Ekitaldi nagusia ere bertan egin dute.
Goikoetxea presidenteak “kooperatibaren bereizgarri nagusia” nabarmendu du: “Kooperatiban dauden pertsonak”. Goikoetxeak 1975eko testuingurua gogoratu du, Lea-Artibaiko ekonomia baserrian eta itsasoan zegoen oinarrituta, formatuta zeuden gazte gehienak kanpora joan beharra zuten lanera. Goikoetxearen ustez, kooperatiben eredu hori gakoa izan da Lea Artibai eskualdeko ekonomia garatu ahal izateko. “Krisia mehatxuka genuenean eta hemen etorkizunik ez zegoenean, kooperatiba industrialak giltzarriak izan ziren Ondarroa, Berriatua eta eskualdeko gainerako udalerriek aukera bat izan zezaten”. Eskerrak eman nahi izan dizkie modu batera edo bestera kooperatibaren historiaren parte izan diren guztiei: “Bakoitzaren ekarpena ezinbestekoa izan da gaur egungo Kidera heltzeko”.
Imanol Pradales Lehendakariak “pozik, harro eta ilusioz” Kide zoriondu du, haren 50 urteko ibilbidearengatik eta kooperatibismoaren balioak “arrakastaren oinarria” direla nabarmendu du. “Hauxe da Bizkai, Araba eta Gipuzkoan daukagun lehiakortasun eta ongizate eredua: enplegua eta aberastasuna sortzea, pertsonen hazkuntzaren mesedetan eta komunitatearen mesedetan”.
Era berean, Lehendakariak esan du erakunde publikoek, enpresen moduan, “arriskatu” egin behar dutela: “Horregatik aurkeztu dugu ‘Euskadi Eraldatzen 2030’ ekimena, gure Herriaren hazkunderako erabakigarria izatea espero dugu. Horretaz gain, ikerketarako eta garapenerako Hazitek dirulaguntzak indartu ditugu, eta orain dela hilabete batzuk industria kooperatibak sustatzeko funts berri bat ipini genuen abian. Duela 50 urte bezala, zalantzaz betetako garai honetatik indartuta aterako gara”.
Etxanobek adierazi du kooperatiba “ahalegin kolektiboaren eredu” dela “berrikuntzagaz eta enpleguagaz dagoen konpromisoarena”. Kide erreferente dela azpimarratu du, ez bakarrik Lea-Artibain edo Bizkaian, baita Euskal Herrian eta munduan ere. “Garai berrietara egokitzen jakin izan duen enpresa da, momentu oso zailak gainditzeko gai izan dena eta gaur egun momentu oso ona bizi duena”, esan du Ahaldun nagusiak. 2023an 131 langile zituen Kidek, eta orain 190 ditu. Inguruko herritarrei eta batez ere gazteei, Lea-Artibain errotzeko aukera ematen die kooperatibak: “Kide denok lortu nahi dugunaren adibide argia da, enplegua eta gizarte aberastasuna lortuko dituen jarduera ekonomikoa sortzea”. Rodrigezek nabarmendu du Mondragon Korporazioa “beti eta betirako” egongo dela Kideren alboan laguntzeko prest. Proiektu “oso potentea” dutela esan bakarrik ez, kooperatibak emandako “etengabeko aurrerapausoak” goraipatu ditu.
Euskararen garrantzia
Euskara izan dute denek ala denek ahoan. Izan ere ekitaldi guztia euskera hutsean egin dute, Etxanobek eta Pradalesek bakarrik hartu dute gaztelaniarako tarte txiki bat. Lea-Artibai “euskararen arnasgune nagusietako bat” dela gogoratu dute eta kooperatibako lehendakariak argi utzi du ez duela “Kide ez euskaldun bat” ezagutzen eta horrela jarraitzeko “asmo argia” erakutsi du. Pradalesek ere eskertu du “euskarak eta bezeroak” erdigunean jartzea. Etxanobek, adibidez, eskerrak eman nahi izan dizkiete kooperatiba osatze duten guztiei “euskararen alde egindako lanagatik” eta aldundiaren “konpromiso bera” agertu du “euskara bizirik mantentzeko”.
