Taher Ali: "Epe ertainera, Israelen desagerpena ikus dezakegu"
Taher Alik hitzaldia eskainiko du martitzenean [urriak 7], 19:00etan, Azkue Aretoan. Bertan, Israelen inguruko mitoak gezurtatuko ditu. Biharko [urriak 4] Iruñeko mobilizaziora joateko dei egin du.
Lekeitio-Palestina elkartasun taldeak antolatuta, Taher Ali Ateneo Palestinoko palestinar militanteak hitzaldia eskainiko martitzenean, 19:00etatik aurrera, Kultur Etxeko Azkue Aretoan. Hizlariak, saioko nondik norakoak erabat azaldu barik, Palestinaren inguruko egoeraren berri emango du. Era berean, bihar 12:00etan Iruñeako Antoniuttitik aterako den manifestazio nazionalean parte hartzeko dei egin du.
Hasteko, zein da azken bi urteetako balantzea?
Gizartearentzat inflexio puntu argi bat izan da, zentzu askotan. Lehendabizi, Israelena zuzenean emititutako lehen genozidioa da, erabateko inpunitateagaz, gainera. Uste dut etorkizunean efektu handia izango duen kapitulu bat dela, batez ere, jendea konturatzen denean zein puntura arte onartua izan den. Jende asko begiak zabaltzen ari da orain, bi urteren ostean, zuzeneko edo zeharkako 700.000 hildako inguru daudenean. Orain hasi da mugimendu apur bat egoten, baina orain arte onartu eta beste alde batera begira egon direnak asko izan dira. Horrek etorkizunean berdina egiteko ateak zabaltzen dizkie beste batzuei. Inperialismo hutsa da. Horrez gain, munduak orain ikusi du zein den benetako Israel. Israelen berezko izaerak genozidiora bideratzen du, eta ez bakarrik Palestina konkistatzeko; erasoak egin ditu Libanon, Sirian eta Iranen, eta ustezko aliatua den Qatar ere erasotu du. Ameriketako Estatu Batuen herrialde satelite bezala jarduten duten estatuak Palestinako Estatuaren errekonozimendua onartzen hasi dira. Horrek esan nahi du konturatu direla ez dela posible bakerik izatea Israel bere horretan mantentzen den bitartean.
Baina ez da azken bi urteetako kontua, aspalditik dator.
Garrantzitsua da gogoratzea mende bateko historia duen borroka dela. Propaganda saiatu izan da konbentzitzen Palestinaren okupazioa Bigarren Mundu Gerraren eta juduekiko genozidioaren eragin bat izan zela. Baina ez da horrela. Palestinaren okupazioa XIX. mendearen amaieran hasi zen, Basileako Kongresu sionistan. Bertan, Europaren izenean, Palestina okupatu nahi zuten; eta bestelako tokiak ere jarri zituzten mahai gainean, Uganda edo Patagonia, esate baterako. Azkenean, Palestina aukeratu zuten, baina ez beraien historian atzera egitearren, baizik eta lurraldeak duen garrantzi estrategikoagatik. Asiako sarrera da Mediterraneotik, Suezeko Kanaletik hurbil dago eta toki funtsezkoa da Arabiar Penintsulan dagoen gas eta petrolioa kontrolatzeko. Sionistek Palestina kolonizatzeaz hitz egiten zuten, ez zituzten gaur egungo eufemismoak erabiltzen. Dena esan beharra dago, sionismoa Alemaniako Nazismoaren aliatua izan zen 30eko hamarkadan, naziekin batera legala izan zen alderdi bakarra izan baitzen. Holokausto garaian, eskuin muturreko alderdi sionistak, gaur egungo Benjamin Netanyahuren alderdiaren oinordekoak, naziekin aliantzak osatzen saiatu ziren.
Azken asteetan, munduko erakunde desberdinek pausoak edo keinuak izan dituzte Palestinarekiko. Zelan ikusten dituzu?
Oso sintomatikoak dira. Israelen proiektua amaitu egin da, erabateko porrota izan da, bere barne kontraesanengatik, batez ere. Erlijioan badaude oso muturrekoak direnak eta laikoak direnak, badaude eredu arrazista baina demokratikoa nahi dutenak eta zuzenean apartheid edo estatu faxista bat nahi dutenak. Hemen kontua da ez dagoela erabateko kolonizaziorik jaioterriko herritarren desagerpenik gabe. Horrela gauzatu ziren, besteak beste, Ameriketako Estatu Batuetako, Kanadako eta Australiako kolonizazioak. Bertako herritarrak ia sarraskitu zituzten. Baina badaude adibideak, Hegoafrika, Sudan eta Argelia, non ezin izan zituzten akabatu, eta horrenbestez, ezin izan zuten erabateko kolonizaziorik gauzatu. Horregatik, nazioarteko mugimendu txiki horiek Israelen genozidioa etetea nahi bazuten ere, azkenean gertatu dena da Israelek eraso moduan hartu duela. Orain, Europako herrialdeek Palestinako Estatua errekonozitzea ez da alde praktikotik zuzenean Israeli kalte egiten dion zerbait. Israelek eraso moduan hartzen du, eta horregatik erasoak areagotzen ditu. Haiek dira beraien eraso eta jarrerekin nazioartean arazoak sortzen dituztenak, eta aldi berean, beraien isolamendu ukaezina bultzatzen dutenak. Israel gizarte koloniala da, maila guztietan Mendebaldearekiko erabateko mendekotasuna duena. Beraz, harreman zubi horiek suntsituko diren unea helduko da.
“Zehazki Israelen desagerpena eskatzen duen mobilizazio bakanetakoa da biharkoa”
Baina atzean interes oso handiak ditu, eta batez ere, Ameriketako Estatu Batuak da aliatu nagusia.
Orain arte denak saiatu izan dira Israelen aurpegia zuritzen, edozelan gainera, kultura, kirola edo ekonomia aitzakia hartuta. Israel ere beharrezkoa da Europarentzat eta Mendebaldearentzat, Israel etengabeko base militarra da eta inguruko errekurtso ekonomikoak kontrolatzen ditu. Beraz, errentagarria den bitartean, mantentzen eta hauspotzen jarraituko dute.
Eta egoera horren aurrean, zelan ikusten duzu etorkizuna epe labur edo ertainean?
Inflexio puntu garrantzitsuak ematen jarraituko da. Etorkizunean, 2025eko iraila funtsezkotzat ikusiko da, Israelek arlo askotan jaso dituen porrotengatik. Baina, aldi berean, uste dut porrotaren kontziente izatean, eta kontuan hartuta aurrerantz ihes egiten bakarrik dakiela, eraso bortitzen bat gehiago osatuko du, ez bakarrik Palestinako herria; Libano, Iran edo Irak erasotuko du. Nazio Batuen Erakundea eta Ameriketako Estatu Batuak inguruko herrialdeekiko gerra batean sartu nahiko dituela uste dut. Orain arte ikusi ez duguna ikusiko dugu, eraso berriekin eta gerra berri batekin. Horrenbestez, genozidio are eta bortitzago eta handiago bat biziko dugu. Hori bai, epe ertainera, Israelen desagerpena ikusiko dugulakoan nago. Edozein modura, Mendebaldeko herrialdeak hori ekiditen saiatuko dira. Horregatik, bi estatuetan kontzeptua gehiagotan entzungo dugu. Horregatik, Palestinarekiko solidaritatea oso irmoa izan behar da; estatu palestinar demokratiko bakarraren alde egin behar da.
Biharko manifestazio nazionala dago deituta Iruñean. Zergatik da garrantzitsua?
Mundu osoan zehar jasotako laguntasuna handia izan da, baina Euskal Herriak toki berezi bat izan duela esango nuke. Gainera, zehazki Israelen desagerpena eskatzen duen Europako mobilizazio bakanetakoa dela esatea garrantzitsua da.
Martitzenean, berriz, hitzaldia eskainiko duzu Lekeition. Zer azalduko duzu?
Gai oso zabala da, hitzaldi askotarako ematen duena. Batez ere, propagandaren bidez zabaldutako Israelen inguruko mitoak eta esandakoak gezurtatuko ditut; esate baterako, Israelek Hamas diruz lagundu zuela bere sorreran, Palestinaren kolonizazioa Holokaustoko judutarren ondorio bat izan zela eta Alemaniak erruduntasun sentipenak dituela gezurra dela.
