Eskafandra taldeak bere lehen diskoa aurkeztu du
Joseba Iturraspe McOnak taldeko musikari lekeitiarraren azken lana da.
Eskafandra 2024ko udaberrian sortu zen taldea da, Joseba Iturraspe lekeitiarraren eta Raimundo El Canastero taldeko Iban Martinen elkarlanaren harira. Proiektu “ausarta” dela diote “poparen egitura klasikoak eta sonoritate garaikideak” uztartzen dituena. Taldea Maren Seijo bateria-jotzaileak, Maider Zubizarreta teklatu-jotzaileak eta Elena Lezaun baxu-jotzaileak osatzen dute.
Joan den barikuan [urriak 3] kaleratu zuten beraien lehen diskoa, taldearen izen beragaz. Hamaika abestiz osatutako diskoa da, eta aurretik lau aurrerapen abestu argitaratu izan dituzte: Azken Oroigarria, Arrakasta, Eskafandra eta Tabernako Argiak. Hain zuzen ere, McOnak taldeko kideak dio “energiaz beteriko” abestiak direla.
Horrez gain, taldeak ikus-entzunezko unibertso propioa sortu nahi du, “soinua, irudia eta zuzenean eskaintzen udten esperientzia uztartuz”. Adibidez, lau aurrerapen abestiek bideoklipagaz eman dituzte argitara eta taldearen “unibertso estetikoa” eraikitzen laguntzen dutela dio.
Eskafandraren musika pop, rock alternatibo eta elektronikaren artekoa “fusioa” dela diote taldekideek, “teklatu eta sintetizadoreen koloreekin eta atmosfera emozional sakonekin”. Letrak Iturraspek berak idatzitakoak dira: “Poetikoak, sinbolismoz betetakoak eta itsas iruditeria nagusi dutela, norberaren eta gizartearen arteko tentsioak eta kontraesanak aztertuz”.
