35 lagun elkartu dira Garraitz ezagutzeko bisita gidatuan
Lekeitioko Denboraren Bankuak deituta, martitzenean [urriak 14] osatu zuten ibilbidea. Hurrengo asterako auzolanetarako deia egin dute.
Parte hartzailean, Garraitzen.Lekeitioko Denbora Bankua Lekeitioko Denboraren Bankuak, Atabaka Kultur Alkartearen, Lekitto Bedarra eta udalaren laguntzagaz, Garraitz irlako altxor historikoak eta bitxikeriak ezagutzeko ibilbidea osatu zuten 35 lagunek martitzenean [urriak 15]. Uztaileko irteeran lekurik izan ez zutenek lehentasuna izan zuten eta bisita gidatua beste behin ere arrakastatsua izan zen.
Isuntza hondartzatik atera ziren 17:00etan eta Atabaka elkarteko Guillermo Ruiz de Erentxunek gidatu zuen ibilbidean. Bost tokitan egin zuten geldialdia; malekoian, San Nikolas ermitan, tontorrean, militarren kuartelean eta kanoien tokian. Bakoitzean Ruiz de Erentxunek zenbait azalpen eman zituen eta antolatzaile zein parte hartzaileek “oso pozik” amaitu zutela nabarmendu dute.
Hain zuzen ere, partaide gehienak lekeitiarrak baziren ere, azpimarratu dute tartean izan zirela Amoroto, Mendexa, Bermeo edota Azpeitiko bizilagunak ere bai. Denek ala denek “oso ondo” baloratu zuten ibilbidea eta eskerrak eman zituzten “hurbileko historia ezagutzeko aukera ederra” eskaintzeagatik. Ikusmin handiena sortu zuena frantzesek egindako kuartela izan zen, bertan 35 soldadu bizi izan zirelako. Horrez gain, tontorretik Gipuzkoako kostalderako dauden parajeek ere arreta deitu zuten.
Lekeitioko Denboraren Bankutik gogoratu dute irteera hileroko taldearen egitasmoa izan dela. Hurrengokoa, dagoeneko udazkenean sartuta, perretxiko irteera izango dela aurreratu dute. Aurrerago emango dute ekimenaren inguruko xehetasun gehiago.
Gainera, Lekeitioko Lagunkoi taldeak beste auzolan baterako deialdia egin du. Plazako musika kioskoko barandilaren pintaketa osatzeko deia egin dute. Ahal den “parte hartzea handiena” izateko bi egunetan banatu dute auzolana: urriaren 20an 10:00etatik 13:00etara eta 24an 17:00etatik 20:00etara. Amaieran, bakoitzak ekarritako janariagaz, partaideen artean merienda egingo dute.
