Ekintza txikiek duten garrantzia azpimarratuko du Asteklimak
Banakako eta taldeko ekintzen bitartez trantsizio energetikoa eta klima aldaketa publiko guztietara hurbiltzeko tailerrak eta sentsibilizazio ekimenak egingo dituzte bihar [urriak 17] hasi eta urriaren 26 [domeka] bitartean, Lea-Artibaiko hainbat herritan.
Trantsizio energetiko eta aldaketa klimatikoaren erronkaren aurrean herritarrak mobilizatzea bilatzen duen hamar eguneko ekimena heltzear dago: Asteklima. Euskadiko Klima eta Energiaren Astea Eusko Jaurlaritzako Industria, Trantsizio Energetiko eta Jasangarritasunaren sailak bultzatzen du, Energiaren Euskal Erakundeagaz eta Ihobe ingurumen jarduketarako sozietate publikoagaz lankidetzan, baina, tokian tokiko erakunde eta udalek bideratzen dituzte denetariko ekimenak, eta horiekin hasiko dira bihar (urriak 17), eta hala jarraituko dute urriaren 26ra bitartean.
Banakako eta taldeko ekintzen bitartez trantsizio energetikoa eta klima aldaketa publiko guztietara hurbiltzeko tailerrak eta sentsibilizazio ekimenak dira Asteklimaren oinarria, eta horiek Ekintza oro, txikia bada ere, garrantzitsua da lelopean antolatu dituzte Amoroton, Aulestin, Ispasterren, Markina-Xemeinen eta Ziortza-Bolibarren.
Eredu energetiko iraunkorrago baterantz joateko pausoak emateko eta klima aldaketari hobeto egokitutako eta harekiko erresilienteagoa den gizarte baterantz joateko ekintzak dira eragile sozialek bideratzen dituztenak. Izan ere, ekimenek klima aldaketaren eraginei eta eskura dauden baliabideei buruzko ezagutza sustatzen dute, baita tokiko ekintzak bultzatu ere, udalerri eta eskualdeei legearekin bat datozen ekimenak ezartzen lagunduz. Hezkuntza arloan, gazteak eta ikastetxeak jasangarritasunaren kultura indartzen duten jardueretan inplikatzea ere bilatzen du Asteklimak.
Hala, etxeko energia fakturak ulertu eta berriztagarriai buruzko informazioa jasotzeko informazio puntuak jarriko dituzte hainbat herritan: Amoroton, Aulestin, Ispasterren, Markina-Xemeinen eta Ziortza-Bolibarren. Horietan, etxeko energia fakturak ulertu eta berriztagarriei buruzko informazioa jasotzeko aukera izango dute bertaratzen direnek, eta euren argindar eta gas fakturak aztertzeko aukera ere izango dute. Gainera, gasoila eta gasa kentzeko alternatibak aztertu eta diru laguntzei buruzko informazioa ere jaso dezakete.
Amoroton, energia berriztagarriei buruzko hitzaldia eskainiko dute bihar, kultur etxean. Udaletxeko aerotermia proiektua eta eskolako instalazio fotovoltaikoak izango dituzte aztergai, horien funtzionamenduan sakondiko baitute, eta horietatik zelako onurak eta aurrezpenak jaso gura dituztenaren berri emango dute.
Eguaztenean (urriak 23), Energia Planari buruzko eta frontoiko fotovoltaikoari buruzko azalpena emango dute Aulestin: “Energia berriztagarri horien funtzionamenduaren azalpena emango dugu, baita horietatik lortzea espero ditugun onurei eta aurrezpenei buruz ere”.
Eta, eguenean (urriak 24), bero sarera bisita egingo dute Ispasterren. Herritar guztientzako jarduera izango da, eta biomasa galdaren gela eta siloa, instalazio fotovoltaikoa eta baterien gela bisitatuko dituzte, baita kolektore termikoen instalazioa eta bero sareko kontsumitzaileentzako energia estazioa ere.
Markina-Xemeinen, informazio puntuaz gain, beste bi hitzaldi izango dituzte aukeran, eta bata ikasleei zuzendutakoa izango da. Izan ere, energia berriztagarriei buruzko ariko dira Bekobenta eskolan, autokontsumoaren kontzeptua azalduz eta bertako instalazio fotovoltaikoen funtzionamenduaren berri emanez. Gainera, aurreratu dute monitorizazio plataforman bistaratutako datuei buruzko azalpenak eskainiko dituztela, eta frontoiko instalazio fotovoltaikora bisita egingo dutela. Horrez gain, gasoila eta gasa ordezkatzeko alternatibak ezagutaraziko dituzte kultur aretoan, izan ere, asko dira sortzen diren galderak: Noiz amaitzen da erregai fosilak ezabatzeko epea? Ze alternatiba berriztagarri daude etxea berotzeko? Zenbateko aurrezpena lor daiteke?
Ziortza-Bolibarren konpost eta energia egunean bilduko dira eguenean (urriak 23), saio praktiko zein kultur taldeetan. Hori dela eta, energiari buruzko informazioa jasotzeko aukera izatea izango dute, udalak eta Bolintxu Energia Berriztagarrien Komunitateak, eta herritarrak deitu dituzte parte hartzera. Horrez gain, konpostari buruzko informazio puntua ere jarriko dute plazan, goizean zein arratsaldean.
Gainera, arratsaldean, konposta egiteko tailerra jasoko dute frontoi atzeko aparkalekura bertaratzen direnek, Herribixi kolektiboaren eskutik. Eta, horren osterako, kolektibo berak, Konpostaren sorrera ipuin kontaketa saioa prestatu du, Nerea Garzia ipuin kontalariaren eskutik ailegatuko dena, Kanpo Santu ondoko gunean. Eta, hori bakarrik ez: Nork lapurtu du konposta? ikuskizuna eskainiko dute herriko plazan. Azken horiek —ipuin kontalaria, tailerra eta antzerkia— Elizaldeko ibilbide barruan kokatuko dituzte, zeinetan bi edukiontzi gunetatik pasatuko diren.
EGITARAUA.
Amoroto.
Bihar, barikua.
12:30-14:00 eta 16:30-18:00. Etxeko energia fakturak ulertu eta berriztagarriei buruzko informazioa emateko informazio puntua, herriko plazan; euria bada, kultur etxean.
18:30. Amorotoko energia berriztagarriei buruzko hitzaldia, kultur etxean. Udaletxeko aerotermia proiektua eta eskolako instalazio fotovoltaikoak izango dituzte aztergai.
Aulesti.
Urriak 20, astelehena.
16:00-19:00. Etxeko energia fakturak ulertu eta berriztagarriei buruzko informazioa emateko informazio puntua, herriko plazan; euria bada, udaletxeko arkupean.
Urriak 23, eguena.
18:00. Energia planaren jarraipena eta frontoiko fotovoltaikaren azalpena, udaletxean.
Ispaster.
Urriak 20. astelehena.
16:00-19:00. Etxeko energia fakturak ulertu eta berriztagarriei buruzko informazioa emateko informazio puntua, herriko plazan; euria bada, kultur etxean.
Urriak 24, barikua.
17:00. Bero sarera bisita eta azakpena egingo dute, herritar guztientzat.
Markina-Xemein.
Urriak 2o. astelehena.
12:00. Energia berriztagarriak Bekobenta eskolan hitzaldia eskainiko dute Markina BHIn.
Urriak 24. barikua.
10:00. Energia berriztagarriak Bekobenta eskolan hitzaldia eskainiko dute Markina BHIn.
12:30-14:00 eta 16:30-18:00. Etxeko energia fakturak ulertu eta berriztagarriei buruzko informazioa emateko informazio puntua, Goikoportalean; euria bada, Plazabarrioean.
18:00. Gasoila eta gasa ordezkatzeko alternatibak hitzaldia, kultur aretoan.
Ziortza-Bolibar.
Urriak 23, eguena.
12:30-14:00 eta 17:00-19:00. Etxeko energia fakturak ulertu eta berriztagarriei buruzko informazioa emateko informazio puntua, udaletxean.
10:00-13:00 eta 16:00-20:00. Konpostaren informazio puntua, plazan.
18:00. Zer da konposta? tailerra, Herribixi kolektiboaren eskutik, frontoi osteko parkinean.
18:45. Konpostaren sorrera ipuin kontaketa, Herribixi kolektiboaren eskutik, Kanpo Santu ondoko gunean. Nerea Garzia ipuin kontalaria bertaratuko da.
19:30. Nork lapurtu du konposta? ikuskizuna, Herribixi kolektiboaren eskutik, herriko plazan.
