Askotariko produktuez gozatu dute Aulestiko IV. Azokan
Gaur [azaroak 29] goizean 16 postu jarri dituzte frontoian. Eguerdian elkartu da jenderik gehien.
Pixkanaka Aulestiko Azoka bere tokia aurkitzen doa Lea-Artibaiko egutegi bete-betean. Gaur [azaroak 29] azokaren laugarren aldia osatu dute herriko frontoian. 16 postu jarri dituzte guztira: sei ekoizle eta 10 artisau. Horrelakoetan gertatu ohi den bezala, eguerdian elkartu da jenderik gehien azokan. Hala ere, iaz baino jende pixka bat gutxiago ibili dela esan dute. Aulestiko azokaren kasuan, frontoian egiterakoan, eguraldi bikainak ez du gehiegirik lagundu.
Herritarretako asko Markina-Xemeingo Larruzen postuaren inguruan elkartu dira: Euskal Herriko ahuntz gaztarik onena sariduna, azaroaren 8an Tolosan ospatu zen Euskal Herriko esne, gazta eta jogurten IV. txapelketan Euskal Herriko ahuntz gaztarik onenaren saria eskuratu zuen Larruzek, 24 hautagairen artean. Hori gutxi ez, eta World Cheese Awards lehiaketan, hiru hilabete eta erdiko gazta onduagaz euren mahaiko urrezko domina lortu zuten, bi hilabete eta erdiko eta lau hilabete eta erdiko gaztekin, zilarrezkoa, eta sei hilabeteko gazta onduagaz, brontzezkoa.
Aulestin, aurretik Berriatuan bezala, ezin izan da animaliarik egon, artzain txakurrak egon dira bakarrik. Hain zuzen ere, ganadu azokak aldi baterako debekatu dituzte Euskal Herri osoan, behiei eragiten dien Dermatosi Nodular Kutsakorra gaitza ez hedatzeko. Horrenbestez, aurtengo azoka desberdina izan da. Hori bai, jan-edana ez da falta izan eta giro bikaina nagusitu da. Azkenik, Aulestiko Eskolakoek eta Markina BHIko ikasleek postu bana jarri dute ikasbidairako dirua lortzeko asmoz, eta bertan izan da Kubike Aisialdi Taldea ere bai.
