Euskal Herriaren burujabetzarako bidean, "anbizioa, determinazioa eta ardura" aldarrikatu ditu Gure Eskuk
Eusko Jaurlaritzak Araba, Bizkai eta Gipuzkoarako lortutako eskumenen balorazio positiboa egin, eta "aurrera egiteko aukera aprobetxatzeko beharra" erakutsi du Gure Eskuk.
Beste bost eskumen lortu ditu Eusko Jaurlaritzak, Espainiako Gobernuarekin berriki lortu duen azken akordioari esker. Bidea “luzea eta gorabeheratsua” izan bada ere, Gure Eskuk adierazi du herritarren beharrei hobeto erantzuteko eta eskubideak bermatzeko beharrezkoak direla. Euskal Herriak eta bere egitura juridiko-politikoek ahalik eta autogobernu esparru gehien izan behar dutela argi izanik, urrats hori “oso positiboa” dela azpimarratu dute.
Gure Eskuko ordezkarien hitzetan, jauzi bat egiteko aukera dago, eta aukera aprobetxatu behar da: “Orain salto egiteko garaia da; eskumen gehiago behar ditugu, jakina, baina hortik harago, eskumen horiek blindatu behar ditugu, nazio gisako aitortza behar dugu eta erabakitzeko eskubidea gauzatu ahal izateko, modu praktikoak jorratu behar ditugu. Aukera aprobetxatu beharra dago. Beraz, eragile sozial eta politikoei, epe labur eta luzera, arduraz jokatzea dagokigu”.
Helmuga argi baten alde lan egiten jarraitzen du Gure Eskuk: Euskal Herriaren burujabetza osoa: “Euskal Herriko lurralde guztietan erabakitzeko ahalmena handitu eta erabakitzeko eremuak irabazteko aukera daukagu gaur egun”. Euskal Herriaren burujabetza osoa izatea ezinebestekotzat jotzen dute herri bezala biziraun ahal izateko eta “gure hizkuntza eta kultura eusteko”.
Euskal Herriko lurralde guztietan erabakitzeko ahalmena handitu nahi du Gure Eskuk, eta horri lotuta, erabakitzeko eremu gehiago irabazteko lanean ari dira. Honen aurrean, herritar zein eragile denen erantzukizuna gogoratzeaz gain, “anbizioa, determinazioa eta ardura” aldarrikatu dituzte: “Eragile politiko eta sozialek zein herritarrok anbizioz eta determinazioz arizeko beharra daukagu, eta une politikoari dagokion garrantziaren neurriko urratsak egin behar ditugu”.
Adostasunak bilatuta eta helmuga garbi izanda, hainbat autogobernu esparru lortu dituztela adierazi dute. Nazio gisako aitortza baten alde lan egiteko asmoak bere horretan dirau, eta kultura eta hizkuntzari eusteko, egitura, mugimendu eta dinamikak abian jartzen jarraituko dutela nabarmendu dute.
