“Denok elkartu, azken argazkia atera eta izan garena ospatu nahi dugu”: belaunaldiak elkartuko dira eskola zaharrari agur esateko
Martxoaren 14an argazki kolektiboa egingo dute Ispasterreko ikasle ohiek, irakasleek eta familiek; udarako bazkari herrikoia eta argazki erakusketa ere prestatzen ari dira, eraikina bota aurretik.
Eskola zaharraren hormek azken hilabeteak dituzte zutik. Obrek laster hasiko dute bidea, eta eraikinaren zati bat eraitsiko dute ikasturte amaieran. Baina makinak sartu aurretik, komunitateak denbora une batez gelditu nahi du: oroimenak irudi bakarrean jasotzeko.
Horretarako, martxoaren 14an argazki kolektibo handi bat egingo dute eskolaren aurrean. Deia zabalik dago: ikasle ohi guztientzat, garai ezberdinetako irakasleentzat, langileentzat eta familientzat. Helburua ez da soilik argazkia ateratzea; belaunaldiak berriz elkartzea eta urte luzez partekatu duten historia ospatzea baizik.
Antolatzaileek argi dute: eskola berria beharrezkoa da eta ilusioz hartzen dute etorkizuna. Baina aldi berean, ezin dute albo batera utzi eraikin zaharrak utzitako arrastoa. “Hemen daude gure oroitzapenak. Eskola hau gure bizitzaren parte izan da”, azaldu dute.
Eskola txikia izan zen urte askotan, eta horrek berezko giroa sortu zuen. Adin desberdinetako umeak gela berean, irakasle bakarra irakasgai guztiak ematen, nagusiek txikiei laguntzen… Patioan futbolean aritutako arratsaldeak, inauterietako mozorroak, talde-argazki klasikoak, eta ume garaian erraldoi ziruditen espazioak, gaur begi helduekin txikiago ikusten direnak baina bihotzean handiak direnak.
Familia askok lotura berezia dute eraikinarekin: aitona-amonek bertan amaitu zituzten ikasketak 14 urterekin; seme-alabak urte batzuk geroago pasatu ziren pasabide beretatik; eta gaur egun bilobek ere bertan ikasi dute. Belaunaldiak gurutzatu dira horma horien artean.
Argazki egunaz gain, udarako bazkari herrikoia antolatzeko asmoa ere badute. Data zehazteke dago oraindik, baina asmoa argia da: mahai baten bueltan elkartu, lasai hitz egin, anekdotak partekatu eta barreak berriro piztea. Argazki erakusketa bat ere prestatu nahi dute, urteetako irudiak bilduz: klaseko erretratuak, jaialdiak, gurasoek ateratako momentu xumeak… Eskolako bizitzaren zati diren guztiak.
Martxoaren 14ko argazkia ez da soilik eraikin baten aurrean aterako den irudia izango. Herri baten memoria kolektiboa izango da. Izan ere, eskola bat ez da adreiluz egindako eraikin hutsa: bertan bizi izan diren istorioek eta partekatu diren oroitzapenek ematen diote benetako zentzua.
Informazio gehigarria
Argazkia martxoaren 14an, 17:30ean, eskolaren aurrean aterako da. Horretarako, kamisetak egingo dira, eta nahi izanez gero, ondorengo estekan eska ditzakezue: https://forms.gle/9uRJ2HzeJhTxifYX6
