Trinkete Beterano Txapelketak finalerako bidea markatuko duten partida erabakigarriak jokatuko ditu
Master 40 mailako azken aurreko kanporaketak otsailaren 22an jokatuko dira eta bikoteek finalerako txartela eskuratzeko lehen pausoa eman nahi dute.
Beteranoen Trinkete Txapelketako Master 40 mailak bere une erabakigarrietako bat biziko du domekan [otsailak 22], finalaurreko kanporaketetako lehen jardunaldiarekin. Bikoteek final handira sailkatzeko aukera izango dute, baina horretarako bi partidak irabaztea ezinbestekoa izango da.
Goizeko 10:00etan jokatuko den lehen partidan, Lander eta Egaña Latxi eta Madariagaren aurka arituko dira. Ligaxkan Lander eta Egaña izan ziren garaile, baina Elantxobeko eta Foruko ordezkariek euren maila nabarmen igo dute azken neurketetan, eta oraingoan pronostikoari buelta emateko prest daudela erakutsi nahi dute. Gainera, kantxan egongo diren bi pilotariak, Lander eta Latxi, txapeldun izandakoak dira aurretik, eta euren esperientziak pisu handia izan dezake kanporaketako lehen norgehiagoka honetan.
Ondoren, 11:00etan, Rober eta Telleria Salaberri eta Apezetxearen aurka lehiatuko dira. Lehen bikotea da faborito nagusia, esperientzia handiagoa eta sendotasuna erakutsi baititu txapelketan zehar. Nafarroako bikoteak, berriz, lehen aldiz ari dira parte hartzen eta neurketa honen bidez euren maila hobetzea eta lehiakortasuna erakustea dute helburu.
Kanporaketa sistema zorrotza izango da, izan ere, finalera sailkatzeko bi partidak irabazi beharko dira. Bigarren jardunaldia martxoaren 2an jokatuko da, eta beharrezkoa balitz, berdinketa hausteko azken partida martxoaren 8an izango da.
Txapelketak, beraz, “emozio handiko” jardunaldiak agintzen ditu, beteranoek oraindik ere “maila bikaina” dutela erakutsiz eta finalerako lehia guztiz irekita utziz.
