Araba, Gipuzkoa eta Bizkaiko eskola publikoetako jangeletako langileek greba egingo dute
Arabako, Bizkaiko eta Gipuzkoako eskola publikoetako jangeletako langileek greba egingo dute otsailaren 24, 25 eta 26an. "Soldata igoerak aplikatu eta ratioak, funtzioak eta lanaldiak hobetzeko" eskatu diote patronalari.
LAB sindikatuak grebara deitu ditu datozen egunetan Arabako, Bizkaiko eta Gipuzkoako eskola publikoetako jangeletako langileak. Hiru egunetan egingo dituzte lanuzteak: otsailaren 24an, 25ean eta 26an. ELAk ere greba deialdia egin du egun berdinetarako.
LABek adierazi duenez, hitzarmen kolektiboa “blokeatuta” dago: “langileen soldata igoerak ez dira aplikatu eta ratioak, funtizioak eta lanaldiak ez dira hobetu”. Gainera, azaldu dutenez, datozen egunetan greba egiteko aldarrikapenak “argiak” dira: “Patronalari eskatzea hitzarmena negoziatzera esertzeko eta enpresek ordaintzeko dauden soldata igoerak ordaintzeko, bai eta Eusko Jaurlaritzako Hezkuntza Sailari eskatzea duen erantzukizuna bere gain hartzeko eta negoziatzera esertzeko ratioak, funtzioak zein lanaldiak arautzen dituzten araudiak aldatzeko”.
Hala, LABek sektore honetako batzorde paritarioa osatzen duten enpresei “exijitu” die “berehala” onartzeko %0.5eko igoerari dagozkion soldata taulak, “2024ko urtarriletik aurrerako atzera eraginezko ondorioekin”. Izan ere, aipatutako erreklamazioa abenduan helarazi zitzaiela zehaztu dute sindikatutik, Lan Harremanen Kontseiluaren bitartekaritza baten bidez. Honen aurrean, patronalaren erantzuna “aitzakia onartezina” izan dela azaldu dute: “Sindikatuaren asmoa Hezkuntza Saileko lan-kontratuko langileen hitzarmen berriaren taula berriak aplikatzea denez, langileak zigortzeko, ez dute %0.5eko soldata igoera aplikatuko. Orain arte, patronalak indarrean dagoen lan-hitzarmenean jasotzen diren lan kontratudun langileen soldata egoera guztiak aplikatu ditu. Soldata-taulen onarpenaren blokeoa ezin da aitzakia gisa erabili haien aplikazioa eragozteko”. Beraz, LABek “xantaila jasanezin” gisa identifikatu du aipatutako jarrera: “Langileon soldaten eskubideen erabilera kontzientea presio txanpon gisa erabili dutela salatu nahi dugu, hitzarmenaren negoziazioa blokeatzeko eta lan eskubideak murrizteko helburu bakarrarekin”.
LABen ustez, mobilizazioa da egungo egoera “desblokeatzeko” bide bakarra; langileek hala zehaztu baitute. Horregatik, Arabako, Bizkaiko eta Gipuzkoako eskola publikoetako jangeletako langile guztiei grebara batzeko eta mobilizazioetan “aktiboki” parte hartzeko deia egin die.
Izan ere, LAB da sektore honetan gehiengoa duen sindikatua, eta horrek eskatzen duen erantzukizunean jarri du fokua sindikatuak: “Gainerako sindikatuei dei egiten diegu mobilizazio horiekin bat egin dezaten eta elkarrekin lan egin dezagun langileen eskubideen defentsan sindikatuen batasuna berreskuratzeko”.
Bestalde, ELA sindikatuak ere greba deialdia egin du egun berberetarako, hiru eskera nagusi mahaigaineratuz: langileen soldatak KPIa baino gehiago igotzea, egungo ratioak eta lan kargak berrikustea, eta gutxieneko kontratazioak berrikustea: “Sektoreko lanaldi partzialak oso prekarioak dira”. Hala, ELAk azaldu duenez, negoziazio mahaiak hamabost bilera baino gehiago egin ditu, baina ez dute “aurrerapausorik” lortu: “ELAk langileen benetako baldintzei erantzungo dien hitzarmen baten alde egin du”.
Langileak “nazkatuta”. “Ratioak berrikustea beharrezkoa iruditzen zaigu, ez baitaude ondo. Adibidez, 40 umerentzako langile bakarra egon daiteke, eta ez da kontuan hartzen horrek zer-nolako lan karga eragin dezaken. Bestalde, ordezkapenak bidaltzeko orduan ere, batzuetan ez dituzte bidaltzen, beraz, horrek esan nahi duena da langile batek lan bikoitza egin behar duela. Umeak dira, eta ez robotak, eta horrek suposatzen du bakoitzari bere arreta eman behar diozula. Horrez gain, dagokigun soldata igoera aplikatzea ere eskatzen dugu, gure dirua baita”, azaldu dute sektoreko langileek.
