Ireki ditu ateak 'Oceanus Plasticus' erakusketak
Euskal Herriko Unibertsitateak sortutako 'Oceanus Plasticus' erakusketa ikusgai dago Karmeldarren aretoan, Bekobenta Eskolak antolatuta.
Karmeldarren aretoan ikusgai dago erakusketa. Euskal Herriko Unibertsitateak sortutako Oceanus Plasticus erakusketa ikusgai dago Markina-Xemeingo Karmeldarren aretoan, Bekobenta Eskolak antolatuta. Gaur [otsailak 21] ireki dituzte ateak, eta martxoaren 5era arte egongo da zabalik.
Erakusketak Erdi Aroko mapetan agertzen ziren itsas munstroen iruditeria du abiapuntu. Garai hartan, mapagileek itsas bidaiari eta marinelei ohartarazteko marrazten zituzten izaki “beldurgarriak”; oraingo proposamenak, ordea, gaur egungo testuingurura ekartzen du ideia hori, plastikoaren gehiegizko erabilerak eta itsasoetan pilatzen diren hondakinek sortutako “benetako munstro berriak” irudikatzeko eta “giza portaeren ondorio latzak” mahaigaineratzeko. Espezie ozeanikoen eta plastiko hondakinen arteko hibridazioak erakusten ditu, ikuslea hausnarketara gonbidatuz.
Erakusketaren egileak Leire Fernandez eta Eduardo Herrera irakasleak dira, eta proiektua Plentziako Itsas Estazioagaz elkarlanean garatu zuten, EHUko Arte Ederren Fakultateko Sorkuntza eta Diseinu Graduaren baitan.
Eskolan landutakoa “borobilduz”. Bekobenta Eskolak antolatu du erakusketa. Izan ere, eskolako guraso batek oparitutako liburu batetik abiatu zen lanketa: “Liburua ikusi genuenean pentsatu genuen erreza eta egokia zela eskolan lantzeko; alde ludikoa dauka, umeek ikusteko zelan sortzen den guzti hau, eta bestetik plastikoaren gehiegizko erabilera eta itsasoan zenbat plastiko agertzen diren lantzen dira”.
Guraso batek oparitutako liburua.
Hortik abiatuta, aurten eskola osoak “ura” landu du ardatz modura, eta plastikoaren auzia ere hor kokatu dute. Inauterietan ere gai bera izan dute oinarri: txikiek bakoitzak itsas animalia bana aukeratu eta horrela mozorrotu dira; nagusiagoek, berriz, plastikoaren erabilera eta itsasoaren kutsaduraren inguruko lanketatik abiatuta sortu dituzte mozorroak. Gainera, dantzak eta performanceak ere gaiari lotuta prestatu dituzte.
Azken asteotan Blue filma ere ikusi dute, eta ikas-egoera osoa ozeanoen zaintzaren eta plastikoaren arazoaren inguruan ardaztu dute. Testuinguru horretan, erakusketa Markina-Xemeinera ekartzeko aukera sortu zen, eta eskolako irakasleek proiektuari amaiera “biribila” emateko aukera “ederra” zela erabaki zuten. Hala, Ikasleak datorren astean hasiko dira erakusketa bisitatzen: astelehenean hasi, eta HH4tik DBH2ra arteko taldeak txandaka igaroko dira aste osoan.
Ordutegiak. Gaurtik [otsailak 21] martxoaren 5era arte egongo da irekita erakusketa. Eguenetan 10:00etatik 12:00etara eta 17:00etatik 19:00etara; barikuetan 17:00etatik 20:00etara; zapatuetan 11:00etatik 14:00etara eta 17:00etatik 20:00etara; eta domeketan 11:00etatik 14:00etara eta 17:00etatik 19:00etara.
