1976ko martxoaren 3ko Gasteizko sarraskiari buruzko hitzaldia antolatu dute Ondarroan
Hitzaldia barikuan [otsailak 27] izango da, 18:15ean, Ondarroako Kofradia Zaharrean. Ernaik, LABek eta Ikamak antolatutako hitzaldian Matxoak 3ko plataformako kide den Julen Diaz De Argote izango da hizlaria.
2025eko martxoaren 3an Ondarroan egindako ekitaldia. Ondarroako Ernai. 1976ko martxoaren 3an Gasteizen gertatu zen sarraskitik 50 urte pasa diren honetan, Ernaik, Ikamak eta LABek sarraskiari buruzko hitzaldia antolatu dute barikurako [otsailak 27]: “Orduko langileen borroka gogora ekarriko dugu, eta belaunaldi berriei gertatutakoa transmitituko diegu”, azaldu dute hiru eragileek.
Hala, hitzaldia Ondarroako Kofradia Zaharrean izango da, 18:15ean, eta Julen Diaz De Argote Martxoak 3 elkarteko kideak hartuko du hitza. Duela 50 urte 6.000 langile inguruk greba hasi zuten Gasteizen, soldatak mugatzen zituen dekretua salatu eta lan baldintzak hobetzeko. Martxoaren 3an hirugarren greba orokorra deitu zuten, eta arratsaldean, Zaramaga auzoko San Frantzisko Asiskoa elizan batu ziren bilera egiteko. Orduan, Espainiako Polizia Armatua elizan sartu eta langileen kontra jazarri zen, gas negar-eragileak erabili zituen langileak elizatik aterarazteko, eta irten ahala, tiroak egin zizkieten poliziek langileei. Hala, 150 pertsona zauritu eta bost langile hil zituzten.
Mobilizazio zikloa. Hitzaldiaren aurretik, ordea, martxoaren 3an bertan Ikamak deitutako mobilizazioa eta Martxoaren 3 elkarteak sindikatuekin antolatutakoari buruzko nondik-norakoak kokatuko dituzte, baita martxoaren 17an egingo den greba orokorra ere, “bi datak mobilizazio zikloaren baitan kokatzen ditugu, eta biak dira garrantzitsuak hiru eragileontzat. Beraz, herritarrak mobilizatu nahi ditugu; alde batetik, martxoaren 3an ikasle grebarekin bat egin eta Ikamaren zein elkartearen mobilizazioan parte hartzeko deia egin nahi dugu, Gasteizen. Bestetik, martxoaren 17an greba egiteko deia egin nahi dugu, gutxieneko soldata propioa izateko benetako aukera defendatuz”. Horrez gain, hiru eragileek herrian eta eskualdean martxan dabiltzan greba komiteetan parte hartzeko gonbita luzatu diete herritarrei: “Bagabiltza jada herri eta auzoetan greba orokorra antolatzen. Greba komiteak egin ditugu han eta hemen, eta herritarrei bertaratzeko deia egin nahi diegu; ate joka daukagun greba guztion artean antolatzeko”. Egunean bertan, 17:00etan omenaldia egingo dute monolitoan, eta 18:30ean, herri mobilizazioa hasiko da Katedral Berritik.
Ikasleak, grebara. Martxorako greba zikloa deitu zuen urtarrilaren amaieran Ikamak, Atzo, gaur eta beti ikasleok lehen lerroan lelopean: martxoaren 3an ikasle greba eta martxoaren 17an greba orokorrarekin egin dute bat. Hala, martxoaren 3an Gasteizen egingo dute mobilizazioa, 12:00etan Elurretatik abiatuta, duela 50 urte Espainiko Poliziak hildako Francisco Aznar, Romualdo Barroso, Jose Castillo, Pedro Mari Martinez eta Bienvenido Pereda omentzeko. “Guri dagokigu aurreko belaunaldiek egin bezala memoria eta bizi baldintza duinen aldeko borrokan jardutea”, adierazi dute ikasle antolakundetik. Gainera, Lea-Artibai eta Mutrikuko Ikamak autobusak antolatu ditu martxoaren 3rako, eta izena eman nahi duenak antolakundeko kideekin harremanetan jartzeko azpimarratu dute.
