Zabalik dago Markina-Xemeingo Olgetan udalekuetan izena emateko epea
2 eta 14 urte bitarteko haurrei bideratutako udalekuak uztailaren 1etik 30era egongo dira.
Uda honetan ere, 2 eta 14 urte bitarteko haurrek Olgetan udalekuetan egoteko aukera izango dute. Uztailaren 1etik 30era arte bertaratu ahalko dira haurrak, eta zabalik dago izena emateko epea. Gurasoek martxoaren 31ra arte izango dute izen-ematea egiteko epea.
Izena emateko zenbait bide zabaldu ditu udalak. Alde batetik, Markina-Xemeingo Udaletxeko Berton bulegora 8:15ak eta 14:30ak artean bertaratuta egin daiteke. Liburutegian ere badago aukera; goizez, 11:00ak eta 13:30ak artean, eta arratsaldez, 15:00rak eta 19:00ak artean. E-mailez egiteko aukera ere badago, udalekuak@markina-xemein.eus helbide elektronikora idatzita.
Oradinketari dagokionez, Markina-Xemeinen erroldatuta dagoen haur bakarrak bertaratu nahi badu, 190 euroko prezioa ordaindu beharko da. Hiru haur edo gehiagoren izena emanez gero, 150 euro ordaindu beharko dira ume bakoitzeko. Markina-Xemeinen erroladatuta ez daudenek ere badute izena emateko aukera, ume bakoitzeko 220 euroren truke.
Ordainketa egiteko, ES82 3035 0008 73 0080037620 kontua ahalbidetu dute. Kontzeptuan umearen izen-abizenak jarri beharko dira, eta titularrean MAXE izena jarri beharko da. Azkenik, ordainagiria izen-ematearekin batera aurkeztu beharko da.
Informazio guzti hau eta izen-emate orria udaletxean edo www.markina-xemein.eus web orrian aurki daitezke. Gainera, interesdunek begirale izateko izena emateko orria ere bertan aurki dezakete.
