Dantzazale Eguna antolatu dute Lekeition
Maiatzaren 9an ospatuko dute, eta dantzak ikasteko tailerrak antolatu dituzte.
AIKO dantza taldearen eskutik, Dantzazale Eguna antolatu dute Lekeition maiatzaren 9rako. Harritar guztiei zuzenduta dago ekitaldia, dantza gustuko duen pertsona orok dantza egiteko aukera izan dezan. AIKO taldearen 20. urteurren ospakizunaren barruan antolatu dute egitaraua, eta Lekeitioko dantza tradizioa zabaltzeko aukera izango da.
Dantzazale Eguna prestatzeko, AIKO taldeak dantza tailerrak eskainiko ditu, maiatzaren 9an egingo diren dantzak ikasteko aukera emanez. Tailerrak apirilaren 11n, 18an eta maiatzaren 2an izango dira, 12:00etan, Plazan. Euria egingo balu, elizapean egitea aurreikusi dute.
Maiatzaren 9an ospatuko den eguneko egitaraua argitaratu du udalak. 13:00etan dantzaldi ibiltariari ekingo diote, kofradi ingurutik plazaraino egingo dutena. 17:00etan bazkalondoko kantaldi eta dantzaldiak aurreikusi dituzte herriko hainbat taldetako parte-hartzearekin: AIKO Taldea, Lekeitioko Estudiantina, Roberto eta Miren Etxebarria, Jarauta 69 txaranga, Bizkaiko Gaiteroak, Malen eta Andere Zobaran, Rakel Pujana eta beste hainbat musikari eta dantzari arituko dira elkarlanean. Egitarauarekin amaitzeko, 21:00etan larrain-dantza eta agurra egingo dituzte.
