Eskatza Arte Espazioko ikasleen erakusketak ateak zabalik ditu
Erakusketa Karmeldarren Aretoan egongo da ikusgai eguenera arte [apirilak 23].
Eskatza Arte Espazioko pintura ikasleen erakusketak hainbat herritar erakarri ditu. Karmeldarren Aretoa pintura erakusketa baten babesleku izaten ari da beste behin. Eskatza Arte Espazioko ikasleen lanak daude ikusgai, izan ere, euren lanen zati bat herritarrengana hurbiltzeko egindako apustu baten emaitza da. Joan den barikuan egin zuten espazioaren inaugurazioa, eta zabalik egongo da gaur [apirilak 21], bihar [apirilak 22] eta etzi [apirilak 23].
Karmeldarren Aretoko harrizko lau hormak dira pintura ikasleek egindako artelanen euskarri. Ikasleek elkarlanean egin zuten erakusketaren muntaketa joan den astean, arratsalde horretako inauguraziorako dena prest uzteko. Koloreak, eszenak edo objektuak dira artelanen oinarri, eta hauen arteko lotura eta esanahiak kontuan hartuta zehaztu dute erakusketaren egitura.
Mikele Sotil artista bidelagun izan dute ikasleek sortze prozesuan zehar. Bakoitzaren nortasuna eta sortzeko era bakarra eta desberdina dela adierazi du: “Argazkietan oinarrituta egiten dute askok lan, eta bertsioak ere ikusi daitezke”. Egunerokotasuna erakusten duten kaleko eszenek edo paisaia ikusgarriek ere badute tokia erakusketan, luzaroan begira geratzeko lekuak sortuz. Teknika aldetik ere, erakusketa “anitza” dela esan daiteke. Marraz eta kolore ilunagoz sortutako paisaiak daude, hala ere, koloe biziek ere badute tokia hormetan: “Arkatzez, boligrafoz eta errotulkiz eginda daude gehienak. Gianerakoak, olio-pinturak eta akrilikoekin egindakoak dira”.
Emakumez osatutako talde bat da artelanak sortu dituena. “Artista bakoitzaren hastapenak” batzen dituen erakusketa da. Urte hauetan ikasitako guztia praktikan jarri eta bakoitza bere bidea agiten ari dela azpimarratu du Sotilek. Erakusketak, beraz, pintura bidez eraikitako nortasunaren lehen irudiak eskaintzen ditu.
Bertaratzeko, Karmeldarren Aretoa zabalik egongo da gaur [apirilak 21], 18:00etatik 20:00etara; bihar [apirilak 22], 18:00etatik 20:00etara; eta etzi [apirilak 23], 10:00etatik 12:00etara eta 19:00etatik 21:00etara. Gainera, bertan egongo dira artelanen sortzaileak.
