Zabalik dago Urriko Azoka Nagusian izena emateko epea
Urriaren 10ean ospatuko dute Urriko Azoka Nagusia Markina-Xemeinen. Horretarako, ekoizle, artisau eta txosnek uztailaren 20tik 29ra eman beharko dute izena.
Beste urte batez, Markina-Xemeinek hartuko du Lea-Artibaiko Urriko Azoka Nagusia, hala, eskualdeko eta inguruko herritarrek urriaren 10ean izango dute bertako produktuak eta abereak ikusteko eta erosteko aukera. Hori posible izateko eta egun handiarako dena prest egon dadin, ekoizle, artisau eta abeltzainek aurrez eman beharko dute izena.
Ekoizleek, artisauen eta txosnek eskaerak eta dokumentazioa aurkezteko epea uztailaren 20tik 29ra arte egingo da zabalik. Eskaera www.landagarapenaleaartibai.eus webgunean bete beharko da Azoken atalean sartuta. Bide horretatik egin ezin duenak landagarapena@leartibaifundazioa.eus helbide elektronikora idatzi dezake eta bide horretatik bidaliko zaio izen emate orria. Presentzialki egteko aukera ere egongo da, Markina-Xemeingo Lea-Artibaiko Berrikuntza Guneko bulegoan (Xemein etorbidea, 12), 08:30etik 13:30era. Abeltzainen kasuan, izena emateko epea irailaren 2tik 8ra izango da.
Ekoizleek ortuariak, frutak, esneki eta gaztak, ogia eta gozoak, haragia eta eratorriak, eztia, kontserbak eta ahatekiak edo edariak ekartzeko aukera izango dute. Abeltzaintza indartzeko ere baliagarri izango da Urriko Azoka Nagusia, izan ere, erakusgai izango dira eskualdeko eta Mallabiko animaliak eta beste euskal arraza batzuk.
Lea-Artibain garrantzi berezia dute lehen sektorea sustatzeko sortzen diren ekintzek eta azokek; ekonomia, nekazaritza dibertsitatea, ingurumenarekiko errespetua eta kontsumo jasangarriaren alde egiten duten lanagatik. Hala, Urriko Azoka Nagusia ekoizleen eta kontsumitzaileen arteko topaketa eta salmenta gune bat izango da beste behin, saltzaile eta erosleentzat ezinbesteko bihurtu dena.
