Ez dago etxea modukorik
Hirugarren postu paregabea eskuratu du 'Antiguako Ama'-k zaleen aurrean, estropada ikusgarria eginda. Nagore Osorok amonari eskaini dio etxeko bandera, guztiz hunkituta.
Antiguako Ama, estropada amaieran. Argazkia: Iñaki Beitia Non hobeto etxean baino? Aurrekoan Lekittarrak egin modura, zapatuan [abuztuak 8] Ondarroak erakutsi zuen ez dagoela ezer etxekoen berotasunean aritzea baino. Orio liderraren (20.09,64) eta Donostiarraren [20.15,42) ostean, hirugarren denborarik onena egin zuen Antiguako Ama-k (20.24,20), Xabet Gimenok ondo baino hobeto gidatuta.
Ondarroa bigarren txandan aritu zen, Lekittarra, Hondarribia eta Donostiarra ondoan zituela. Donostiarrarengandik bederatzi segundora sartu zen Ondarroako trainerua, lanak ondo baino hobeto eginda eta herritarren txalo eta oihu artean. Donostiarrak hartu zuen aurrea hasieratik, eta etxeko traineruak Hodarribiagaz lehia estua eduki zuen hasieratik amaierara arte. Orbañanosek gidatutako taldeak ihes egingo zuela zirudien momentu batzuetan, baina Antiguako Ama-k abiadura handitu, eta txandako bigarren postuan amaitu zuen. Azpimarratzeko estropada egin zuen Ondarroak, zaletuek gogotzen duten horietakoa.
Lekittarrak estropada txukuna egin zuen. Txandako azkena izan zen, baina egindako lanak merezitako seigarren postua eman zien Iñaki Goikoetxeak gidatutako kuadrillari. 20.30,94ko denboran osatu zuten estropada.
Antiguako Ama, Ondarroako 42. Banderan. Argazkia: Iñaki Beitia
Bigarren txandatik ohorezko txandara eguraldiak okerrera egin zuen, haizeari dagokionez batez ere. Euria hasi zuen, indartsu hasi ere, ekaitza, eta horrek ere eragina eduki zuen lehian. Baldintza txarrak tarteko, bandera Donostiara joan zitekeela pentsa zitekeen, baina haize ufadak baretu egin ziren azken luzean, eta Gorka Aranberrik gidatutako kuadrillak beste garaipen bat lortu zuen, lidertza sendotuz. Aitzol Elu ondarrutarra dabil Orion, eta pozik zegoen etxeko bandera irabazi eta gero: «Astean ontzia ondo joan da, eta elkarri estutuz estropada irabaztea lortu dugu», adierazi zuen, irribarretsu, estropada amaieran.
EuskoTren Ligan Donostia Arraun Lagunak nagusitu zen beste behin. Denboraldiko bandera guztiak astindu ditu Donostiako taldeak, baina Ondarroakoa berezia izan zen taldean ari diren hiru ondarrutarrentzat. Nerea Agirrezabal, Mar Larrea eta Nagore Osoro pozarren zeuden lorpenagaz. Osorok etxeko bandera irabazita “arantza” bat kendu zuela adierazi zuen, eta guztiz hunkituta, eskaintza oso berezia egin zuen: “Joan den urtean amona joan zitzaigun, eta iaz ezin izan nion denboraldiko banderarik eskaini, eta aurten, Ondarroan eta etxean, etxeko bandera amona Natirentzako da”.
Hondarribian, bosgarren eta bederatzigarren
Hondarribiko Bandera egon zen jokoan domekan [abuztuak 9). Lekittarrak bosgarren postua eta Ondarroak bederatzigarrena lortu zuen Gipuzkoako uretan.
Lekittarra bigarren txandan aritu zen, Hondarribia, Santurtzi eta Bermeogaz. Bigarren sartu zen, 20:32,22ko denboran. Donostiarra, Orio eta Zierbenagaz aritu zen Ondarroa hirugarren txandan, etxean ohorezko txandan aritzeko txartela eskuratu eta gero. Ondarrutarrek ondo hasi zuen estropada. Lehen luze oso ona egin zuen Antiguako Ama-k. 20.54,78ko denbora eginda, bederatzigarren postuan sailkatu zen azkenean.
12 eta 13. jardunaldiak amaituta, zazpigarren jarraitzen du Ondarroak sailkapen orokorrean eta postu bat atzetik, zortzigarren Isuntzak.
SAILKAPEN OROKORRA
1. Orio 145
2. Zierbena 122
3. Bermeo 111
4. Getaria 108
5. Hondarribia 105
6. Donostiarra 99
7. Ondarroa 76
8. Lekittarra 69
9. Itsasoko Ama 54
10. San Juan 50
11. Ares 37
12. Chapela 37
