Musika "zoragarri eta historikoa" zabalduko du Ziortza-Bolibarrek
Ziortzako Kolegiatako elizak 38. aldiz hartuko du Ziortzako Kontzertuak musika jaialdia. Organo eta orkestra soinuen bitartez, antzinako musika protagonista izango da irailaren 12an, 13an, 19an eta 20an.
Ziortzako Kontzertuak jaialdiak antzinako musika bere jatorrizko espaziora eramango du beste urte batez. Irailaren 12an hasiko da ekimena, eta bi asteburutan izango dute ziortza-bolibartarrek eta inguruetako herritarrek gaur egungo musika jaialdi berezienetako baten lekuko izateko aukera.
Jaialdiak “ikuspegi musikal jakin bat sustatzea” izan du helburu abiatu zuten lehen urtetik. Hala, erabilitako musika tresnen eta interpretatzeko moduaren bitartez, “obraren konpositorearen garaiko errealitate eta bizipenetara” hurbiltzea lortzen dute musikari eta entzuleek. Ziortzako Kolegiataren ezaugarri akustikoek “bikaintasunera” hurbiltzen du soinua, hala, urtez urte lortu izan den “giro paregabea” sortuko dela ziurtatu dute antolatzaileek.
Irailaren 12an, La Ritirata taldea izango du 38. aldiari hasiera emango diona. Josetxu Obregon biolontxelo jotzaile bilbotarrak zuzendutako taldearen doinuek 18:00etan beteko dute eliza. Argitu dutenez, “Luigi Boccherini musikagilearen jaioterria den Lucca hiria eta Juan Crisostomo de Arriagaren Bilbo aurrez aurre” jarriko ditu emanaldiak. Gainera, memoriaren aldeko kontzertua izango da, izan ere, “kontzertu hau abiapuntu egokia izango da musikagile bilbotarraren bigarren mendeurrena gogoratzeko”. Duela hamabi urte, “Arriagaren hari-laukoteei eskainitako disko bat” argitaratu zuen Obregonek, eta lan horreri eta jasotako sariei esker oihartzun handiko musikari bihurtu zen. Gaur gaurkoz, “aditu nagusietako bat” bihurtu da Arriagan.
Proptia Sydera orkestra barrokoak bi emanaldi egingo ditu kontzertu zikloaren baitan. Irailaren 13koa izango da talde bilbotarraren lehen kontzertua, Roberta Invernizzi soprano italiarragaz batera eskainiko dutena. “Errepertorio barroko eta errenazentistaren interpretazioan aditua den artistak ‘Gloria Ama Birjinari’ programa eskainiko du”, Haendel eta Ferrandi musikarien obrekin. Hiru hamarkada baino gehiagoko nazioarteko ibilbidean, “Ivernizzik zorroztasun estilista eta adierazkortasun handia uztartu ditu”, hala, gaur egun erreferente den artista baten ahotsa entzuteko aukera aparta izango da, 18:00etan hasita.
Irailaren 19an Proptia Sydera orkestra barrokoak bigarren emanaldia eskainiko du. 1767. urtean Haydn konpositoreak sortutako ‘Stabat Mater’ lana izango du oinarri orkestrak. Oraingoan ere ez dira oholtza gainean bakarrik egongo: “Ekoizpena aurrera eramateko Leioako San Juan Bautista Abesbatzaren parte-hartzea izango dugu, Basilio Astulezen zuzendaritzapean”. Hala, Jone Martinez sopranoa, Lucia Gomez Aizpurua mezzosopranoa, Hodei Yañez baritonoa eta Aitor Garitano tenorra arituko dira abeslari lanetan, Jon Malaxetxebarriaren zuzendaritzapean. 18:00etan entzungo dira lehen notak.
Hogeita hamar urte baino gehiagoko ibilbidea duen Artefactum taldeak beteko du eliza irailaren 20an. “Kalitatearen eta hurbiltasunaren zaigilu bereizgarria” duen taldeak Erdi Aroko musika “zoragarri eta historikora” hurbilduko du publikoa. ‘Erdi Aroko musika ondo bizitzeko’ programa aurkeztuko dute, Tacuinum Sanitatis lanean oinarri duena: “Ibn Butlan mediku eta zientzialari arabiarraren liburu ospetsu horrek gizakiaren bizitzako alderdi nagusiak jorratzen ditu: zoriontasuna, maitasuna, elikadura, osasuna…, hau da, bizitza bera.
Organoa, zikloaren erdigune. Organoagaz eskainiko dituzten bi kontzertuk osatuko dute jaialdia. Joseph de
Echevarriak 1686an eraikitako organoaren doinuek tokia izango dute, eta Araba, Bizkai eta Gipuzkoako zaharrena izanda, ikusmin handia sortzen du urtez urte. Elizan bertan dagoen José María Arrizabalagaren 1993. urteko beste organoa ere martxan jarriko dute musika zikloa berezietan bereziena izan dadin.
Irailaren 13an, 13:00etan, ‘Titanen arteko borroka’ emanaldia entzuteko aukera egongo da: “Juan Jose Montero Toledoko Katedraleko organoen kontserbatzailea eta Rui Fernando Soares Portoko Clerigos elizako organista titularra ariko dira” A. Soler, Cabanilles, Antonio de Cabezón eta Handelen obrak interpretatzen. Irailaren 20an, 13:00etan, Bart Coppé tronpeta barroko joitzaileagaz eta Jan Vermeire organistagaz gozatzeko aukera egongo da: “Cavazzoni, Correa de Arauxo, Torelli, Telemann eta Kerckhovenen obrak eskainiko dizkigute”.
Autobusak Ziortza-Bolibartik. Kontzertuetarako sarrera doakoa izango da eta ez da aurretiaz erreserbarik egin behar. Antolakuntzak adierazi bezala, Ziortza-Bolibarko herrigunetik kolegiatara igotzeko doako autobus zerbitzua egongo da 17:00etatik aurrera. Kasu honetan ere, ez da erreserbarik behar.
Egitaraua:
- Irailak 12, 18:00etan: La Ritirata, Josetxu Obregon.
- Irailak 13, 13:00etan: Organo kontzertua, Rui Soarez eta Juan Jose Montero.
- Irailak 13, 18:00etan: Proptia Sydera orkestra barrokoa, Roberta Invernizzi sopranoagaz.
- Irailakk 19, 18:00etan: Proptia Sydera orkestra barrokoa, San Juan Bautista Abesbatzagaz.
- Irailak 20, 13:00etan. Organo kontzertua, Bart Coppé tronpeta jole eta Jan Vermeire organo joleagaz.
- Irailak 20, 18:00etan. Artefactum.
