Lekeitio Lagunkoiak Adinekoen Nazioarteko Egunerako egitaraua aurkeztu du
Egun osoko ekintzak izango dituzte 10:00etan hasi eta 19:00etara arte. Bazkarirako eta arratsaldeko tailerrerako izena eman behar da irailaren 29a aurretik.
Datorren urriaren 1ean Adinekoen Nazioarteko Eguna ospatuko da, eta Lekeitio Lagunkoiak adin guztietako jendeari zabaldutako egun osoko egitarau berezia prestatu nahi izan du egunaz gozatzeko aukera izan dezaten.
Eguna hasteko, 10:00etan ibilbide komentatua izango dute Lekeitiotik Oletara eta hiru kilometroko bidean hainbat txokoren ezaugarri interesgarriak komentatuko dituzte: Uribarren Abaroa egoitzaren zuhaitz bereziei aipamena, Arropainek burdinaren inguruan izan zuen garrantzia, Mendexako ospital zaharraren istorioa eta erreka alboetan dauden burdinolen historia besteak beste. Ibilbidea egin nahi duenak Uribarren Abaroa egoitzaren atean egon beharko du 10:00etarako.
Handik bueltan, 11:30etan Ander Aldazabal herriko alkateak herriko ikasleen laguntzaz ekitaldi bat egingo dute Uribarren Abaroa Egoitzan. Ekitaldi horretan alkateak egoitzaren antolaketa berriaren inguruko azalpenak ere emango ditu. Handik, 14:00etan Egaña Jatetxera joango dira bazkaltzeko tartea hartuz eta arratsaldeko saiorako indarrak hartzeko.
Eguneko azken ekintza Merkatu Plazan izango da Bilboko Itsasmuseum-aren eskutik 17:00ak eta 19:00ak bitartean. Zaharberritzean eta kontserbazioan hasteko tailer praktikoa izango da, eta museoko adituek tresna, altzari eta antzinako gauzek mantenu ona izan dezaten zelan zaharberritu behar diren azalduko dute.
Goizeko ekintzak libreak izango dira parte hartu nahi duten guztientzako, orduan agertu besterik ez dute egin beharko. Bazkariari eta zaharberritze tailerrari dagokionez, plaza mugatuak egongo dira eta interesatuek izena eman beharko dute Kultur Etxean irailaren 29a aurretik. Prezioa 16 eurokoa izango da.
