Hamabi domina etxera, Argentina eta Uruguaitik Euskal Herrira
Euskal Selekzioak hamabi domina irabazi ditu Munduko Txapelketan. Eskualdeko pilotariak ere bertan izan dira.
Euskal Selekzioko pilotariak, garaipenak ospatzen. Euskal Pilota Federakuntza. Munduko Txapelketako azken bi jardunaldiak jokatu dituzte asteburuan, eta Euskal Selekzioak, guztira, hamabi dominagaz egin du buelta etxera: lau urrezko, zazpi zilarrezko eta brontzezko bat.
Asteburuko partidei dagokienez, Aritz Erkiaga ispastertarra garaile izan da zesta-puntako banakako modalitatean eta modalitate berean, Erika Mugartegi markina-xemeindarrak urrea lortu du Espainiako Selekzioagaz, Helena Barrenetxearen -Euskal Selekzioa- kontra jokatutako norgehiagokan.
Erkiagak Olharanen garaituta lortu du urrezko domina (15-12 eta 15-7). Lehen jokoan lehia bizia egon zen bi puntisten artean, baina hamarreko berdinketaren ostean, Erkiagak erritmoa bizkortu, eta lehenengo seta poltsikoratu zuen. Bigarrenean, tentsioa ez zen hain agerikoa izan, 15 eta 7ko markagailuagaz amaitu baitzen lehia, Erkiagarentzat. Hala, egindako lanaren ondorioz, munduko txapela jantzi zuen Erkiagak, eta urrezko domina ekarri du Euskal Herrira. Gainera, Erkiagaren ordezko gisa egon da Ortzi Aldazabal berriatuarra ere.
Barrenetxeak ordezkatu zuen Euskal Selekzioa finalean, eta Mugartegi markina xemeindarrak, berriz, Espainia. Norgehiagoka “ederra” jokatu zuten biek, nahiz eta bi setak Mugartegirentzat izan (11-15 eta 14-15). Hala, Mugartegik urrea poltsikoratu zuen, eta Barrenetxeak, berriz, zilarra, baita Maialen Aldazabal berriatuarrak ere, bera izan baita Barrenetxearen ordezkoa txapelketan. Mugartegiren ordezkoa izan da Arai Lejardi markina-xemeindarra.
Bestalde, Olatz Arrizabalaga gernikarrak brontzezko domina lortu du frontball modalitatean. Bere taldeko Miren Larrartek jokatu zuen hirugarren eta laugarren postuak erabakitzeko partidua, Venezuelako Julieta Rengelen kontra, eta 10 eta 5 eta 10 eta 8 nagusitu zen.
Guztira, hamabi. Hamaika final jokatuta, Euskal Pilota Selekzioak 12 domina lortu ditu. Aurreko asteburuan, Barandikak eta Lekerikak urrea jantzi dute gizonezko binakako zesta puntako finala irabazi ostean. Eñaut Lizeagak eta Oier Elorzek eskuz binakako finala irabazi dute Espainiaren alde aritu diren Canabal eta Apeztegiaren aurka, urrea eskuratuz. Parapelotan, Edorta de Anta y German Elkoro eredu izan dira trinketean, selekzioari beste urre bat emanez.
Maite Ortiz de Mendibil izan zuen lagun Maia Goikoetxeak zilarra eskuratu zuten binakako zesta puntako finalean. Partida gogorra izan zen berriatuarrarentzat, eta Espainiaren elastikoagaz jokatu zuten Erika Mugartegik eta Arai Lejardik ekarri zuten urrezko domina Markina-Xemeinera. Eskuz aritu zen Ekhi Irribarriak eta Gaiza Carregalek osatutako bikotea, Euskal Selekzioari beste zilarrezko domina bat emanez. eta Esteban Gaubekak eta Imanol Ibañezek pala motzean. Parapelotan, 36 metroko frontoian urrea eskuratu dute Edorta de Anta eta German Elkorok frantziar jokalariei 2 eta 0 irabazita. Miren Larrartek brontzezko garaikurra ekarri du frontballean lehiatu ostean.
