Bernedo- Euskal Udalekuak
Lehenengoz alaba nagusiak esan zidanean Bernedora zihoala, 15 egunetarako 100 umeri jaten ematera, galdera hau egin nion: zenbat euroren truke egingo duzu lan hori, han egingo duen beroarekin? Bere erantzuna argia izan zen: ama, bizitzan dena ez da dirua. Harrezkero udaro joan da bertara musutruk lanera. Euskal Udalekuetako proiektua aurrera ateratzeko jende askoren lana dago atzean. Ez baita soilik udako lana, neguan ere zuhaitzak inaustera eta orokorrean, mantenu lanak eta bilerak izaten dituzte eta. Txalotzekoa da benetan egiten duten guztia.
Etxeko txikiena, berriz, birritan egon da Bernedon eta ondo baino hobeto pasatu du, bai lehenengo urtean, baita bigarrenean ere; egun guztietan jolasean eta kantuan, teknologia barik: ez telebistarik, ez mugikorrik, ez tabletarik, ezta Nintendorik ere. Jatorduak ere osasuntsuak: 15 egun luzez litxarreriarik jan gabe.
Hemendik Lea-Artibaiko haurrak animatu nahi ditut euskal udalekuetara joatera, ondo pasatzera eta, euskara eusle diren heinean, familia erdaldunetako neska-mutilek entzun dezaten euskara batuaz gain, badaudela euskalkiak ere.
Dutxatzeko orduan normala da jendaurrean biluzteak lotsa ematea. Alabaina, aukera dago igerilekuan bakarka dutxatzeko; eta bainujantzi ta guzti dutxatu direnak ere badira. Ulertzen ez dudana da besteak biluzik ikusteak molestatzea. Ohituta gaude pantailetan gorputz ederrak ikusten, errealitatea bestelakoa da, ordea. Gure seme-alabek aldageletan denetariko gorputzak ikustea onuragarria da. Amaren gonapetik irten behar dira eta mundua ezagutu. Pantaila gutxiago eta feminismo, euskara eta auzolan gehiago! Gora Bernedoko euskal udalekuak!
