Euskal Zine Bilera: 'Heldu da euskal ikusentzunezkoen hitzordua'
Hasi da 39. Euskal Zine Bilera. Euskara hutsez egiten den zinemaldi bakarra. Lekeition, Euskal Herri mailako kultur hitzordua abian daukagu berriz. Eta berezia da ekimen hau, Lekeitioko udalak antolatu arren, lantalde batean oinarritzen da bere funtzionamendua. Herritarrez, zinezaleez, eta udaleko ordezkari tekniko eta politikoez osatutako lantaldea, hasiera-hasieratik datorren izpirituaren testiguari jarraituz.
Aurreko batean, elkarrizketa batean galdetzen zidaten, ea euskara hutsezko jaialdi batek gehiegi mugatzen ez ote zuen. Galdera «gaiztotzat» jo zuen elkarrizketatzaileak. Baina, segidan konturatu ginen, gaiztoa ez, baizik eta lagungarria zela galdera hori. Izan ere, Lekeitioko hitzorduak hori du balio nagusi. Euskarazko ikus entzunezkoen sorkuntzaren arnasgune dela. Eta horrek egiten du hain baliotsu. Euskararekin baitator kultura Lekeitiora, eta, zinearekin datoz eztabaida, hausnarketa, mina eta plazerra, kontrako zaiguna kudeatzeko gonbidapena, batzen gaituenaz konturatzeko espazioa, zentzumenentzako elikadura, eta baloreen eraikuntzarako lekzioak.
Baina, gainera, kultura sektore bat ere bada! Kulturak bizirik gaituen moduan, kulturatik garatu gaitezke herri moduan. Euskal Zine Bilerak horretan eragiteko bokazio hori du, eta horregatik inoiz baino beharrezkoagoa izaten jarraitzen du. Zuzenean eragiten du, euskalgintzarengan, zinegileengan, eta ekimen hau posible egiten duten aktibitate guztiengan. Eta, zeharka, Lekeitio eta inguruetako Kultura, gizartea eta ekonomia. Estrategikoa da aspektu guztietan.
Eta Euskal Herrian, zorionez, oso kontrako baldintzetan, pasiotik eta konbentzimendutik lan egiten duten sortzaileak badauzkagu. Izan ere, ikus entzunezkoena, sektore txikia da gurean. Baina badaki zertan ari den. Eta goi mailako emaitzak emateko gai da. Kalitate tekniko eta artistikoa eta nazioarteko errekonozimendua badauzkagu dagoeneko. Baina, baliabideak falta ditu. Egiten dena baino esfortzu gehiago behar ditu kulturak eragile publikoen partetik. Garapenerako inbertsio moduan ikusten hastea da gakoa. Giza garapena, eta herri garapena. Herria kulturatik ere egingo dugulako!
Momentuz, aurtengo edizioa martxan denez, hartu dezagun tarte bat EZBn proposatzen diren ekimen desberdinetan parte hartzeko. Begirada berezia aurten emakume zinegileei. Hainbeste ikusten ez den horri. Eta Kontxu Odriozola andrearen ibilbidean parada bariku honetan. Txipreko gatazka politikoarekiko hurbilpen artistiko bat ere egin dugu.. Eta nola ez, zinea. Zine pila bat. Aurten, gurean egin dena ezagutzeko aukera.
Bukatzeko, ezin esan gabe geratu: zorionak ekimen hau sortzearen ideiari tiraka, hainbeste urtetan dabiltzan guztiei. Eta honetan sinisten eta hau babesten jarraitzen duten guztiei, noski. Merezi du honetan lan egiteak!
–Xabier Arrate Burguillo. EZB lantaldeko kidea eta Lekeitioko EH Bilduko zinegotzia.