Euskaraldia izan edo ez, euskaraz 24/7!
Gaurtik abenduaren 4ra arte, Euskaraldia izeneko ekimena jarriko da martxan, bi urterik behin bezala. Honekin, hizkuntza ohiturak aldatu nahi dira, euskararen erabilera sustatzeko asmoz hizkuntza hau ulertzen dugunon artean. Aurten ere, Ahobizi edo Belarriprest izateko aukera daukazu, horien txapa izan edo ez. Bestalde, nobedadetzat, Ariguneak zehaztuko dira, zeintzuk euskaraz adierazteko eremuak izango diren.
Jarraitzeko, Euskaraldia hitza aztertzen badugu, euskarak aldi edota momentu konkretu bat soilik duela pentsa genezake, iragankorra dena. Aldiz, euskararen momentu honek ez du galkorra izan behar, baizik eta guztiz alderantziz. Ekimenak berak 15 egun irauten ditu, baina ohituratzat hartu behar dugu, errutinatzat, uneoro aplikatzeko helburuarekin. Euskararen protagonismoa egunerokoa izan beharko litzateke!
Horretarako, euskaraz mintzatzeko gauza zaretenon artean, euskaraz aritu. Baita euskaraz ulertzen duten horiei ere, hitz egin iezaiezu gure hizkuntzan. «Zu gaztelaniaz bizi zaitezke, lagun iezaguzu guri euskaraz bizi ahal izaten!», esan behar diogu euskara ulertzen duenari.
Honekin lotuta, hau ez da ekitaldi baztertzaile bat, ezta inola ere! Ez du esan nahi euskara ulertzen ez dutenei euskaraz zuzendu behar gatzaienik. Baizik eta, hizkuntza hau ulertzen dugunon artean, euskaraz aritu behar garela, nahiz eta ondoren euskaraz hitz egiteko gai ez diren horiek gure hizkuntzan erantzun ez. Ulertzeko gai badira, nahikoa da hizketaldia euskaraz hasteko.
Horrenbestez, egin ezazu lehen hitza euskaraz! Horrela, aukera gehiago izango ditugu elkarrizketa batean euskararen erabilera aktibatzeko. Agian, beste pertsonak uste duguna baino euskara gehiago daki. Baliteke, nahiz eta hitz egiteko gai ez izan, euskaraz esaten den hori ulertzeko gauza izatea. Zure lehen hitza euskaraz ez bada, ez duzu inoiz hori jakingo!
Hortaz, gogoratu: Gehiago, gehiagorekin eta gehiagotan, euskaraz! 24 orduz egunean, 7 egunez astean eta 365 egunez urtean! Azkenean, euskalduna izateak eta euskaraz inoiz ere ez egiteak ez dauka zentzurik. Ez al dakizu euskara dela euskaldun egiten gaituena? Eta, hizkuntza bat ez da galtzen ez dakitenek ikasten ez dutelako, dakitenek hitzegiten ez dutelako baizik. Hau gerta ez dadin, beharrezkoa da kalera atera eta euskaraz egitea! Goazen ba, Euskaraldia izan edo ez, euskaraz 24/7!
