Lekittarra
Udazken hasierakin batera, arraun denboraldiari be amaiera emon jako; hortaz, sasoia heldu da Lekittarra trainerua bera be, gillaz-gora ipini ta deskantsu ederra emateko eta, nola ez!!, urte osoan zehar hainbeste sakrifizio, esfortzu eta ahalegin egiten dituzten arraunlariek merezidutako oporrak hartzeko.
Zer esan aurtengo denboraldi ederrari buruz!!. Emaitzak albo batera utzita, Isuntza AE zoriondu nahi dut, zeren eta erabaki handi eta txapela kentzeko batekin denboraldia gainditu dute; bai aurten bai, posible izan da traineru bi uretara botatzea. Erabaki hau balorean ipini nahi dut, ez da ahuntzaren gau erdiko eztula enbarkazio birentzako azpiegitura eta antolaketa prestatzea.
Urteotan zehar saiatu da Isuntza Arraun Taldea Lekittoko neskak entrenatzen eta prestatzen, horren adierazle bateletan eta trainerilletan lortutako emaitzak dira. Goi mailako arraunean jarduteko aukerak eta bideragarritasunak bilatzeak, azkenean, posible egin dau, eta neska gaztetxoekin betetako traineru Lekittarra-k beste arerioekin aurpegia galdu barik denboraldi oso polita egin dau, Piter eta Josuren aginduetara. Nola ez, esperantza eta ilusioia sortu dabe zaleon artean, hori da bidea eta erronka, ea astiro-astiro trainerua uretan mantentzea bermatzen dan. Aupa Neskak!!
Mutilek, Saguaren lemapean eta Osertzen esanetara, denboraldi izugarria egin dute, ACTn 2024ko postua mantendu dute eta, urte askotan atea joka ibili ondoren, azkenian Kontxako Ikurriñean sartzeko sare preziatua lortu dute. Lekittar denok, batzuk Donostian, besteok irratia entzuten eta telebistaren aurrean, sufritzen eta bultzatzen, brankaz itsasoari eta haizeari, ziaboga hartu eta popadan laster Lekittarra Saguaren lemak aidean ekarri zuen helmugaraino. Sekulako harrera egin geuntson Lekitttarrok Lekittarra-ri Antzar Egun bizperan, danok batera joan ginian Isuntzara merezidutako ongi etorria emotera, poza, negarrak, ilusioia eta etorkizuna. Bikain.
Herri txikia izanik, traineru bat gorengo mailan egotea eta neskena uretan mantentzea izugarrizko arrakasta da. Gaur egun, Lekittarra-ren helburua urtetik urtera onenekin egotea da, hori lortzen dugun bitartean, lekittarrontzako ohorea eta sare preziatu da; gorengo mailan ibiltzeak beren momentu onak eta txarrak dakartza baina, garai batean bezala, egunen batean ikurriñak helduko dira, eta denok jungo gara ospatzera. Goza dezagun ba momentu eder hau! Ostean, negua hasi aurretik, bueltatu beharko da ta, pabeilloiak ireki eta hainbat eta hainbat neska-mutilek datorren urteko denboraldia prestatzen hasteko, hortik aurrera entrenatzailearen aholkuak entzun, batelak prestatu eta lepoan jaso eta uretara berriro!!
Neguan zehar, zenbat bider, haizea!!, euria!!, itxasoa!!, errekako iluntz hotza eta abar… Haiek neska-mutilek uretan entrenatzen ikusita, hotzkirria sartzen jaku!! Abadien moillatik, entrenatzailea ahotsak eta txistuak, arraunlarien maila hobetu eta zuzendu nahian. Gero, batel eta trainerilla ligak eta txapelketak datoz, eta jarraian, badator neska eta mutil traineruen denboraldia. Azken urteotan ikuskizun zoragarri hau, udaberrian sartu eta batera hasten da, jeitsierakin eta itsasoan bertan egiten diren estropadekin, baliozkoak dira traineru bakoitzak uda aurretik bere «puesta a punto» egiteko, eta noski, geu zaleok geure eguneroko hartu-emonian eztabaidak eukiteko.
Ez dut nahi amaitu eskerrik asko eta besarkada handi bat emon barik orain arte Lekittarra-ko arraunlari eta entrenatzaile izan dan Osertz Aldairi. Aupa Osertz!! Aupa Lekittarra.
