Mutrikuko EH Bildu: 'Egun beltza izan zen...'
Duela urtebete inguru, Mutrikuko Udalak 500.000 euro itzuli zizkion Gipuzkoako Foru Aldundiari.
Diruok udalarenak ziren, eta ez zeukan inolako agindu legalik tamaina honetako diru itzulketa hau burutzeko.
Diru hori 2015eko abenduan aldundiak eman zion herriari, Mijoako pabilioi batean inguruko nekazarientzako esnekien produktuak sortzeko, bertako arrainekin eta barazkiekin plater prestatuak egiteko eta Akuakulturako enpresa proiektuak bultzatzeko.
Langintza gogorra egin behar izan zen aurreko legealdian Gipuzkoako Foru Aldundia konbenzitzen proiektu honetarako dirua eman zezan, eta 2015 eko lehen hilabeteetan obren lizitaziorako oinarriak zabaldu ziren eta enpresa batzuk aurkeztu ere bai.
Baina aldundi berriak (EAJ/PSE) dirua bueltatzeko eskatu zion udalari, ez zuelako garbi ikusten era honetako proiektuen beharra. Hala doakigu lehen sektorea!!!
Eta Mutrikuko udal berriak, EAJren baietzarekin eta Berdeen abstentzioarekin, baimena eman zion alkateari, ebazpena sinatu eta dirua itzul zezan…
Egin ziren bilera-udalbatzarretan eta herriratu ziren orrietan, erabaki tamalgarri hau ezkutatzeko, bi gezur handiren bidez nahastu nahi izan zen herria.
Alde batetik, ez zeukala bideragarritasun ekonomikorik eginda, eta egina zeukan; eta bestetik, ez zegoela nekazarien atxikimendurik, eta 500 nekazari inguru zeuden eta daude inguruetan era honetako azpiegituren beharrean.
Gehienez ere urtero udalarentzat 35.000 euroko kostua izango zen. Ondarbeltzeko hondartza garbitzea baino gutxiago!!!
Gogoratu baino ez, gure ustetan, oso erabaki txarra, atzerakoia eta desegokia izan zela baserritarrentzat, akuakulturako enpresa proietuak lantzen ari zirenentzat eta Mutrikuren etorkizunarentzat.
–Markel Arizmendi Arrasate. EH Bilduren garapen lantaldearen izenean.
