Mutrikun berriz?
Ekonomiaren Garapen, Jasangarritasun eta Ingurumen Saileko Portu Zuzendaritzakoak berriro Mutrikurekin gogoratu dira. Baina ez orain lau urte erre zen Kofradia Zaharra konpontzeko, ezta ere gaizki hasi eta gaizki bideratutako dikeko obrari gaur dagoen tokian ganorazko bukaera emateko.
Oraingoan ere, urtero bezala, Urola ibaian kokatuta dagoen ontziolak itsasontzi berria itsasoratu behar duenez, Eusko Jaurlaritzako Portuetako Zuzendaritzak, denon diruarekin, dragatzeari ekin dio Zumaiako bokalean. Ondoren, Mutrikuko portuko bokalean hustuko dituzte handik ateratako hondakinak. Hondar garbia dela diote. Hainbeste urtez lantegien metal astun eta bestelakoez josita egon den Urola ibaiaren bukaeran hondar garbia edukitzea sinesgaitza egiten zaigu.
Argi geratu da Zumaiako Dike «autodraganteak» ez duela bere lana egiten. Hala ere, 2021. urtean itsasontzi bat ontzioletatik ateratzeko daukan irtenbide bakarra bokalea dragatu behar izanak XIX. mendera eramaten gaitu berriro. Aldaketa klimatikoa, ingurumenaren zaintza, NEXT proiektu famatuak… Benetan prest al gaude?
Ez da urrutiegi joan behar aukerak badaudela jabetzeko. Urdaibaiko Biosfera erreserban kokatutako dagoen Murueta ontziolako itsasontziak (Zumaian eraikitzen diren baino dezente handiagoak) itsasoratzen dira inolako dragarik burutu gabe. Baina itsasontziari flotagailuak soldatu behar zaizkio. Eta gero kendu. Eta horrek kostu ekonomiko bat dauka.
Baina horiek dira horrelako gune babestu batean ontziolak kokatzearen betebeharrak. Gogoratu behar da Urolako itsasadarra «ES2120004 – Urolako Itsasadarra» ere kontserbazio eremua dela.
Mutrikuko portuko kanpoko bokalean botatzen diren hondakinak Mutrikuko sarrerako kanalean zabaltzen dira, ur azpiko basamortu bat eratuaz. Honetaz gain, sakonera gehiago murrizten dute portu historikoko sarrera oraindik ere arriskutsuagoa bihurtuz.Zumaiako ontziolari behin eta berriz draga lanak diru publikoz burutzeak Europako legedia betetzen al du? Ez al da eskutuko diru laguntza?
Hilabete bukaeran dauzkagu marea biziak, oraindik garaiz gaude dragarik burutu gabe Zumaiako ontziolatik itsasontzia flotagailuak erabilita itsasoratzeko.
–Rafa Perez Beristain, Mutriku Natur Taldea. Mutriku.
