Urriko Azken astelehena
Urriak 25, astelehena, Gernika. Urriko Azken Astelehen Ez-Astelehena. Eguraldi ederra, terrazak beteta, aparkalekuak gainezka, kotxeak baita espaloi gainetan. Eskola, lantegi eta abar luze batek jai. Irrati eta telebistetako esatari eta kamerak protagonisten bila.
Astelehena da, baina ez da astelehena. Merkatua dago, astelehenero lez, baina ez da astelehena; ez-ASTELEHENA.
Baserritarrok hemen gaude gure gala ederrenak jantzita badaezpada. Gala ederrak ez gure janzkeragatik, baizik eta gure postuen janzkeragatik. Badakigu ez dela Urriko Azken Astelehen normal bat, non milaka pertsona merkatu pasa, egun pasa, parranda pasa Gernikara arrimatzen diren.
Badakigu jendetzarik ez dela egongo aurtengoan, ez direla urteroko ehun mila horiek hurbilduko gure postuetara, baina gaur jai duten guztiek, klaserik emon behar ez duten guztiek, lantegira joan behar ez duten guztiek, txosnetan lan edo edan egin behar ez duten guzti horiek… guzti horientzat ipini ditugu txukun gure postuak.
Inozoak gu! Gernikako plazaren izena guztion ahotan eta gure jeneroak astelehenero gure bezero fidelak diren horien ahoan bakarrik. Diskurtsoa eta praktika; batzuk diskurtsoa eta beste batzuk praktika. Denok hurbilekoa, lokala, Km0, ekologikoa eta abar nahi ditugu diskurtsoan. Teoria eta praxia, gura eta izatea.
Datorren urtean, bai, datorren urtean Urriko Azken Astelehena normala izango denaren itxaropena dugu denok, baina baserritarrok ez dugu gure aurretik milaka pertsona pasatzen diren Urriko Azken Astelehen bat izan nahi, hori ez-normala da eta.
Datorren Urriko Azken Astelehenean zuontzat gure lanaz, gure lurraz, zerutik jasotzen dugun euriaz ekoizten dugun luxuzko produktuak zuen ahoetara heltzea gura dugu, ez hitzez, ekintzez baizik. Hala ulertzen ez baduzue ere, baserritarrok ekoizten ditugun produktuak luxuzkoak dira, munduko edonongo goi mailako sukalde baten erabiltzeko modukoak. Zuontzat ekoiztutako luxuzko produktuak.
Datorren urteko Urriko Azken Astelehena etorri bitartean, astelehenero hemen gaude baserritarrok zuon zai.
