Xabier Txakartegi gogoan
Gure bizitzan zehar pertsona asko ezagutzen joaten gara, baina gitxi izaten dira euren izateko moduan aparteko zeozer eskaintzen dabenak, arlo batzuetan eredu izaten diranak. Xabier Txakartegi izan da niretzat horreetariko bat.
Oso pertsona konprometitua sinisten ebanagaz, dana emoteko prest egoana, nekaezina, beti adostasunaren alde lan egitekoa, abertzalea, euskaltzalea, laguntzailea, hartuemon errezekoa, kirolzalea, abeslaria, herrikoia, bere buruarentzat interesik bakoa… familia maite eban pertsona eta fede handikoa.
Bere bizitzan zehar gure herrian hainbeste arlotan lan asko eta asko egindakoa: esku-pelota eskolako sortzailea, Bizi Iturri odol-emoileen elkarteko arima, Euskal Ezkontzako partaidea, Batzokiko erreferentea, danon alkatea; Eliz koruan, Marijesi taldean, Kilin-kala abesbatzako kantaria…
Holako pertsonak joaten jakuzanean, danok zeozer galtzen dogu, herrian hutsune bat sortzen da, benetako zerbitzari bat falta jaku, eta niretzat hortxe dago eredua, benetako zerbitzari izatean.
Eskerrik asko Xabier. Gure artean gelditzen dira zuk eginak eta, gure bihotzean, zure oroimena.
Jainkoa lagun, Agur eta Egun Handira arte.
– Sabin Lauzirika
