Zebra bidearen aurrean zai
Hemen nago, euripean, zebra bidearen aurrean so. Hotz egiten du eta dagoeneko ur ttanttak nire kolkotik behera erortzen ari dira. Bizkarrean somatzen dut hezetasun hotza, baina hori berdin dio nire aurretik igaro den seigarren kotxearen gidariari, zein bere kotxearen haize egokituaren berotasunean eta maite duen musika entzuten dihoan.
Arraioa, aterkin haundiak maite ditut baina gaur neurea baserrian ahaztu dut, ez zegoen euri antzik eta. Agian horrexegatik ez naute ikusten, neure aterkin haundia baserrian ahaztu dudalako. Ziur, bestela aterkin koadrodun haundia ikusi eta lehen kotxeko gidaria zebra bide aurrean geratuko zen; edo agian bigarren kotxe gidaria. Edonola ere, seguru sei kotxe baino gutxiago pasatuko zirela geratu aurretik.
Hemen nago zebra bide aurrean, busti eta hotzik, aspaldion zenbat jenderi «nire eskubidea» entzun diodan errepasatzen dudan artean. Bai, antzaz zebra bidearen aurrean «nire eskubidea da» pasatzearena, baina nire aterkin koadrodun haundi barik ikustezina naiz kotxe gidarientzat.
Eta jendea zein oker dagoen iruditzen zait. Zebra bidearen parean ez da nire eskubidea aurrera joatea. Eskubideak ezin dira «nireak» izan, eskubideak «gure» izan behar dute, bestela ez dira eskubide. Horrexegatik hain zuzen eskubide bat urratzen denean ez da «nire eskubidea» edo «zure eskubidea» urratzen, «gure» eskubidea baizik.
Gizartean, gizataldean bizi garan pertsonak gara eta eskubideak pertsona gisa ditugu, herritar gisa, herri gisa, kolektibo gisa, nahiz eta horietariko batzuk norbanakoei aplikatu behar, oraintxe bertan zebrabidearen aurrean urratsa emateko «gure» eskubidea nire pertsonarengan urratzen ari diren bezalaxe.
Halaxe dira eskubideak, denonak, momentu jakin batean bakoitzak erabili edo ez. «Nire» diren ustezko eskubidean ari direnak beti dira diktadore batek, matxista batek, zapaltzaile batek… besteengan ezartzen dituen zapalketa mota bat.
Horrexegatik, datozen egunetan, etxekoekin batera egoteko «gure eskubidea» urratuta duten guztietaz gogoratuko naiz; dela, Puerton, Santoñan, Basaurin….
