Igorren hasiko da 24. Bizkaiko Bertsolari Gazteen Txapelketa

Asier Alkorta

Amoroto,Aulesti,Berriatua,Etxebarria,Gizaburuaga,Ispaster,Lekeitio,Markina-Xemein,Mendexa,Munitibar,Ondarroa,Ziortza-Bolibar

2016/02/16

Txapelketa bihar [otsailak 17] hasiko da. Aurten, 48 bertsolarik parte hartuko dute txapelketan. Bertsolari horiek, hain justu, seiko taldeetan banatuko dira eta talde bakoitzak eskualde bat ordezkatuko du. Eskualdeak ondokoak izango dira: Lea-Artibai, Busturialdea, Arratia, Durangaldea, Enkarterri-Ezkerraldea, Hego Uribe, Uribe-Butroe eta Uribe-Kosta. Finalaurrekoak Arratzun eta Zallan jokatuko dira, martxoaren 2an eta 8an, hurrenez hurren.

24. Bizkaiko Bertsolari Gazteen Txapelketaren aurkezpena

Finala, ostera, martxoaren 18an izango da, Bilboko Kafe Antzokian, azken urteetan egin modura.

Txapelketaren aurkezpena gaur [otsailak 16] egin da, Bilboko BBK Salan. Besteak beste, ondokoek parte hartu dute aurkezpenean: Ixone Zubieta BBKko Gizarte Kultura arduraduna, Ione Narbaiza Bizkaiko Bertsozale elkarteko ordezkaria, Juanjo Respaldiza Bizkaiko Ikastolen Elkarteko bertsolaritzaren arduraduna eta Jone Uria azken Bizkaiko Bertsolari Txapelketako finalistarik gazteena.

Saioak eta sailkapena

Markina-Xemeinen, esaterako, martxoaren 1ean jokatuko da sailkapena, Lea-Artibai Ikastetxean (4. kanporaketa). Horretan, Lea-Artibaiko taldea Hego Uribe taldearekin neurtuko da.

Bizkaiko Bertsolari Gazteen Txapelketako saioak, sailkapena eta ariketak.

1992an hasitako txapelketa

BBK-k antolatuta, 1992. urtean egin zen lehen aldiz Bizkaiko Bertsolari Gazteen Txapelketa. Funtsean, txapelketak euskal kulturaren ahozko adierazpenik sustraituenetariko bat gazteen artean sustatzea zuen helburu.