Kontsumobidek hitzarmena sinatuko du Kutxabank eta Laboral Kutxagaz, Ondarroko kaltetuek hipoteka berregituratu ahal izateko
Kontsumoko Euskal Institutuak eguaztenean [apirilak 20] sinatuko du hitzarmena Kutxabank eta Laboral Kutxa bankuekin. Hitzarmen horren arabera, bi banku horiekin hipoteka duten eta Kamiñaldeko lur jausiaren ondorioz kaltetuen artean dauden ondarrutarrek hipoteka berregituratu ahalko dute.
Guztira, hitzarmen horrekin 90 familia eta negozio jabe baino gehiagok negoziatu ahalko dute euren hipoteka bi bankuekin. “Kontsumobide lanean ari da gainerako bankuekin ere hitzarmen hori egiteko”.
Hitzarmenagaz, Kontsumobidek martxoan etxebizitzak eta negozioak utzi behar izan zituztenen “egoera ekonomiko zaila arindu” nahi izan du.
Hipoteka berregituratzeko aukerarik ez dutenei, ostera, bestelako neurri osagarriak hartzeko aukera eskainiko zaie.
Hipoteka berregituratzeko baldintzak:
- Urte bat kapital amortizaziorik gabe. Familiaren egoeraren eta etxebizitzaren bilakaera tarteko, urtero berrikusi ahal izango da, gehienez ere bost urtez.
- Amortizazio epea 30 urtera zabalduko da, gehienez. Mailegua eman zenetik hasiko dira urteak zenbatzen. 40 urteko epea ere eskaini ahalko da, familiaren egoeraren arabera.
- Interes tasa %0 izango da, kapital amortizaziorik gabeko epean.
