Su eta argi ikuskizunagaz amaitu dira Arretxinagako San Migel jaiak

2017/10/02

Hiru egunetan era askoko ekitaldiekin gozatzeko aukera izan dute Arretxinagara hurreratu direnek. Eguzki ederragaz hasi ziren jaiak barikuan [irailak 29], baina atzo [urriak 1] eta herenegun [irailak 30] toldopean ere egon behar izan dira markina-xemeindarrak euritik babesteko. Eguraldia hala ere, ez da izan aitzakia eta Xemeingo udaletxe zaharraren aurreko plaza beteta egon da egunero. San Migel egunean modura, meza egon zen atzo, Arretxinagako baselizan, eta ostean hasi zen Tortilla Txapelketa. 13:00ak arte eduki zuten herritarrek tortillak Arretxinagara eramateko. Denetara 17 aurkeztu ziren lehiara, eta auzoan gelditu zen saria. Tortilla guztietatik, Padarra baserriko Oihana Etxebarriarena begitandu zitzaion epaimahaiari onena. Hiru lagunek osatu dute epaimahaia aurten: Jone Ansotegik, Iker Barrutiak eta Carlos Arrazuak. Etxebarriaz gain, parte hartzaile guztiek ere izan zuten sukaldeko ohol bat opari.

[zuzenean ARGAZKI GALERIA IKUSI]

Epaimahaiak tortillak probatu bitartean, bertsotan egin zuten eskualdeko hiru bertsolarik. Eguerdiko giroa atsegin bihurtu zuten Xabat Galletebeitia lekeitiarrak, Josune Aramendi markina-xemeindarrak eta Garazi Navarro amorotarrak. Txapelketa ostean ere, egin zuten kantuan, ederto. Plaza beteta. Jai guztietan bezala, musikak ere bete zuen plaza atzo arratsaldean. Mikel Urdangarin eta bere taldekideen kontzertuak publikoaren txalo zaparrada eragin zuten. Aurten kaleratu duen bere hirugarren diskoa, Margolaria, aurkeztu zuen musikariak Arretxinagan, eta bere kanta ezagunetako batzuk ere oparitu zizkien plaza bete zuten jarraitzaileei.

[zuzenean ARGAZKI GALERIA IKUSI]

Ane Gabarain eta Iñake Irastorza aktoreek ere publiko zabala erakarri zuten Arretxinagara. Jarlekurik ez zen gelditu libre Bi izarren kalenturak antzezlana ikusteko, eta zutik jarraitu zituzten batzuk, Hortentsia aktoresaren eta Gertrudis antzerki zuzendariaren arteko komeriak. Jaiak zapore onagaz amaitzeko, jaietan salgai egon den zozketako oparia zotz egin zuen Arretxinagako Jai Batzordeak. Euro baten truke bertoko produktuez betetako otzara eramango du 0088 zenbakia duenak.

San Migel jaiak 2017 (Markina-Xemein, Arretxinaga)

HONEKIN LOTUTA:

Erlazionatutako edukiaARGAZKI GALERIA: Markina-Xemeingo Arretxinagako San Migel jaiak 2017