Nerea Ibarzabalek Amurrioko finalaurrekoan kantatuko du
Bertsolari Txapelketa Nagusiko finalaurrekoen bigarren itzuliko lehen saioa jokatuko da domekan [azaroak 19], Amurrion (Araba), eta bertan egongo diren sei bertsolarien artean egongo da Nerea Ibarzabal bertsolari markina-xemeindarra. Beñat Gaztelumendi, Etxahun Lekue, Jon Maia, Jon Martin eta Sustrai Colina izango dira Ibarzabalegaz batera Amurrioko Bañueta kiroldegiko oholtzara igoko diren beste bost bertsolariak.
Ohi bezala, 17:00etan hasiko da saioa eta ateak 15:30ean irekiko direla jakitera eman dute antolatzaileek. Sarrerak www.bertsosarrerak.eus atarian egongo dira eskura, eta aurrez amaitu ezean, egunean bertan ere zabalduko dute leihatila, 15:00etan.
Eginbeharreko ariketak aldatu egingo dizkiete bertsolariei lehen itzulitik bigarrenera. Horrela, Aintzane Irazusta gai-jartzailearen gidaritzapean, hauek izango dira parte-hartzaileek egin beharko dituzten lanak:
Bertsolari Txapelketa Nagusiko 5. final laurdenetako saioa. Argazkilaria: Gari Garaialde / Bostok Photo / Bertsozale Elkartea
- Binaka, gaia emanda, hiruna bertso zortziko handian.
- Binaka, gaia emanda, hiruna bertso zortziko txikian.
- Binaka, gaia emanda, zortziko txikian puntutan, zortzi bertso osatu arte.
- Binaka, gaia emanda, hiruna bertso hamarreko txikian.
- Kartzelako lana: banaka, gaia emanda, hiru bertso nahi den doinu eta neurrian.
