Maitasun adierazpenez betetako omenaldia egin diote Amets Txurrukari

2017/12/09

Zaletu, lagun eta taldekideen estimua hurre hurretik sentitu ahal izan du gaur [abenduak 9] Amets Txurruka txirrindulari ohiak. Amets Txurruka Lagunartiek ekitaldi berezia antolatu dio omenaldi gisa, eta inork ez du falta nahi izan. Hasi berri duen etapa berrian zorterik onena opatu diote batzuk banaka edo taldean grabatu dizkioten bideoetan, Markina-Xemeingo Kontzejupean bertatik bertara omendu nahi izan dute beste askok. Garaipen asko, baina bai eta lagun asko ere egin ditu Amets Txurrukak bere txirrindulari ibilbidean, eta hori agerian geratu da gaurko omenaldian. Dueloetako aurkariek, bere kirol ibilbideko taldekideek eta beste kirolari batzuek eskerrak, zorionak eta eurekin parte hartzeko gonbiteak ere luzatu dizkiote. Ez du erraza izango Txurrukak horiei guztiei erantzutea. Zerrenda luzea izan da, hiru bideoetan banatuta ikusi ahal izan dena. Aurreko urteetako Merezimendu Sarietako dueluetan parte hartu zuten Orkatz Beitia, Txus Jaio, Alarabi Triatloi Taldea, Ondarroako Arraun Taldea, Berriatuko Urepel Kirol Taldea, Lekeitioko Garraitz, Gontzal Hernando eta Itzal zaldia, Txomin Arana, Igor Romero eta Nahia Quincoces agertu dira lehenengo. Bere txirrindulari ibilbideko txirrindulari asko ondoren: Peio Arreitunaindia, Igor Astarloa, Beñat Albizuri, Jorge Azanza, Mikel Landa, Koldo Fdez de Larrea, Igor Anton, Mikel Nieve, Pello Bilbao, Omar Fraile, Esteban Chaves, Igor Romero, Julian Eraso eta Eibarko Txirrindulari Elkartea eta beste abar luze bat. Eta beste kirolari batzuk azkenik: Mikel Pradera txirrindulari ohia, Victor de la Parte txirrindularia, Unai Bustinza futbolaria eta Leire Etxaniz, Andoni Aretxabaleta, Mikel Urrutikoetxea eta Pablo Berasaluze pilotariak besteak beste. “Beti erreferentzi bat izango zara bizikletan eta bizikletatik kanpo ere bai” edo “kirolari batek eraman dezakeen onena daramazu, bere taldekideen eta zaletuen maitasuna” esan dizkiote beste hainbat maitasun-adierazpenen artean, bizitza berri zoriontsua opatuz.

[Zuzenean ARGAZKI GALERIA ikusi]

[Amets Txurrukari egindako ELKARRIZKETA irakurri]

Kontzejupean. Joseba Artza Urta eta Amets Arzallus izan ziren Txurrukari egindako lehen Merezimendu Sariko bertsolariak, eta eurak izan dira agur ekitaldiari hasiera eman diotenak. Bideoen tartean Markina-Xemeingo Txirrindulari Elkarteko txirrindulari gazteek arkua egin diote gurpilekin eta oholtzara igo da Txurruka.

Gari musikariak kanta bi eskaini dizkio Amets Txurrukari.

Kirolari ez direnak ere nahi izan dute egun garrantzitsua Txurrukagaz partekatu. Hala, Gari musikaria igo da oholtzara eta bera azken diskoko kanta berri bat eskaini du. “Izan garenari eta garenari erreferentzia egiten dion kanta horietako bat da. Zu ere hor zaude, bizimodu berri baten hasieran eta horregatik aukeratu dut”. Bigarren kanta bat ere jo du aspaldiko partez: Aitormena. “Ez dira betiko garai onenak” letra ozen entzun da Kontzejupean. Chandal Recordseko kideak lehenengo, eta Amets Txurrukak, Mikel anaiak eta Josu Anitua Atotek ondoren, lagundu diote Gariri kantuan, bai eta Kontzejupea bete duen jendetzak ere. Esker ona erakutsi du Amets Txurrukak. “Eskerrik asko denei etortearren, ez naiz ni berba askokoa eta gauzak erraz adierazten dituena. Bakar bakarrik esan nahi dizuet munduan txirrindulari asko daudela oso onak, baina inork ez daukala horrelako zalerik ez horrelako lagunartekorik, eta omenaldi asko ikusi ditut, baina honelakorik ez dago inon. Ez da gaurkoa bakarrik, aurreko urteetan egin den dena; momentu onetan eta txarretan beti egon zarete nire ondoan, eskerrik asko”.

[Zuzenean ARGAZKI GALERIA ikusi]

[Amets Txurrukari egindako ELKARRIZKETA irakurri]

8 urte izan aurretik hasi zen Txurruka Markina-Xemeingo Txirrindulari Elkartean eta beragaz egon nahi izan dute gaur. Bizikletan jarraitu dezan, maillota, kulotak eta txaleko hori bat oparitu dizkiote. “Jendeak bidegurutze asko egin ditu eta zuk ere besteentzako egiteko da txaleko hori”.

Markina-Xemeingo Txirrindulari Elkarteko ordezkariak oparia ematen Amtes Txurrukari.

Markina-Xemeingo Udalak ere oparia eman dio markina-xemeindar guztien izenean; Juanjo Txurruka alkatea eta Joseba Iraolagoitia zinegotzia igo dira oholtzara. Amets Txurruka Lagunartie izan da azkena oparia ematen. Denek sinatutako mailot horia oparitu diote “euren Tour-aren garaile denari”.

[Zuzenean ARGAZKI GALERIA ikusi]

[Amets Txurrukari egindako ELKARRIZKETA irakurri]

Eta ekitaldi ofizialagaz amaitzeko, aurreskua dantzatu dio gaztetan beragaz lasterketetan ibilitako Iban Amiasek. “Heldu da etapa honen amaiera, baina lortu dudana baino gehiago lortzerik ez neukala uste dut. Ez kirolari begira batez ere, hori baino gehiago lortu dut: herri oso bat eta lagun pila bat hemen egotea. Momentu txarretan, aurrera egin behar denean hor egon zarete eta hori da gehien baloratzen dudana”. Ekitaldia amaituta, jaiak aurrera egin du Aterkings eta Chandal Recordsen kontzertuagaz.

Amets Txurrukari XIII. Merezimendu Saria

Erlazionatutako edukiaArgazki galeria: Amets Txurrukari XIII. Merezimendu Saria