78 bertsolarik parte hartuko dute Bizkaiko Bertsolari Txapelketako lehen fasean
Inoiz baino parte hartzaile gehiago izango ditu Bizkaiko Bertsolari Txapelketak. Aurten, 78 bertsolarik parte hartuko dute lehen fasean, eta horietako 23rentzat lehen aldia izango da. Antolatzaileak “pozik” agertu dira parte hartzearekin, eta nabarmendu dute bertsolari gazteek izena emateak erakusten duela “egindako transmisio lana”.
Formatuari dagokionez, 2016an abiatutako ereduari eutsiko diote: txapelketa udaberriko sailkatze fasearekin hasiko da, eta udazkenean jarraituko du, kanporaketekin. Sailkatze fasean hamahiru saio egongo dira, eta 11 herritan jokatuko dira. Apirilaren 14an izango da lehena, Bilbon, eta maiatzaren 26an azkena, Abadiñon. Goizeko saioak 12:00etan izango dira, eta arratsaldekoak, 17:30ean. Nobedade bezala, aurten, Ondarroan eta Getxon saio bikoitzak egongo dira; goiz eta arratsaldez.
Lea-Artibaiko 12 bertsolari ariko dira txapelketan: Bikain Urkiri Etxebarria (Ondarroa), Aissa Intxausti Aburruza (Lekeitio), Josune Aramendi Perez (Markina-Xemein), Nahia Ibarzabal Gisasola (Markina-Xemein), Aitor Ruiz Urizar (Lekeitio), Aitor Arrizubieta Egaña (Lekeitio), Lander Ibarluzea Bikandi Aitxulua (Etxebarria), Iñaki Lersundi Arrizabalaga (Ondarroa), Garazi Navarro Ugarteburu (Amoroto), Xabier Iturraspe Gandiaga (Mendexa), Eneko Arrate Sololuze (Markina-Xemein) eta Lurdes Ondaro Mallea (Munitibar).
Aurtengo txapelketako irudia kolore askotako baso bat izango da. Antolatzaileek azaldu dute irudiarekin adierazi nahi dutela txapelketan, basoetan bezala, “ikusten dena baino askoz gehiago” dagoela. “Txapelketan bertsolarien lana ikusten da, baina horren atzean ekosistema oso bat dago: elkartea, bertso eskolak, plazak eta abar”, adierazi du Ione Narbaiza Bizkaiko Bertsozale Elkarteko sustapen eragileak.
Kanporaketetan 30 bertsolarik parte hartuko dute. Sailkatutako bertsolariei 2014ko finalistak gehituko zaizkieUdaberriko fasea bukatuta, uda ostean helduko diote berriz txapelketari. Udagoieneko fasea urrian abiatuko da. Bost kanporaketa, hiru finalaurreko eta finala edukiko ditu. Kanporaketetan 30 bertsolarik parte hartuko dute. Sailkatutako bertsolariei 2014ko finalistak gehituko zaizkie. Finalaurrekoetan, berriz, hemezortzi bertsolarik kantatuko dute, eta 2016ko finalistak gehituko zaizkie. Finala Bilbon izango da, eta zortzi bertsolarik parte hartuko dute. Oraindik ez dituzte zehaztu kanporaketa faseko egunak eta lekuak.
Asier Ibaibarriaga Bizkaiko Bertsozale Elkarteko presidentea, Ione Narbaiza elkarteko sustapen eragilea eta Ana de Castro Bizkaiko Foru Aldundiko Euskara zuzendaria, aurkezpenean. Argazkia: Bizkaiko Bertsozale Elkartea
[SAIOAK+saio bakoitzeko parte hartzaileak]
Sarrerak. Udaberriko faseko sarrerak ez dira aurretiaz salduko. Saio bakoitza hasi baino ordu erdi lehenago erosi ahalko dira, txarteldegian. Sarreren prezioa 3 eurokoa izango da, 2 eurokoa bazkideentzat, eta 16 urtetik beherakoak doan sartu ahalko dira. Txapelketari buruzko informazioa eskura daiteke Bizkaiko Bertsolari Txapelketaren webgunean eta Bizkaiko Bertsozale Elkarteko sare sozialetan.
