Martitzenean zotz egingo dituzte Kamiñalde-Iturribarriko 34 etxebizitza
Kamiñalde-Iturribarriko ekialdeko saileko erregimen bereziko 36 etxebizitza tasatuetatik 34 zotz egingo dira datorren martitzen arratsaldean. 17:00etan izango da, Kalare Deuna kofradiako areto nagusian. Bi etxebizitza elbarrientzako gordeta daude, eta...
Kamiñalde-Iturribarriko ekialdeko saileko erregimen bereziko 36 etxebizitza tasatuetatik 34 zotz egingo dira datorren martitzen arratsaldean. 17:00etan izango da, Kalare Deuna kofradiako areto nagusian. Bi etxebizitza elbarrientzako gordeta daude, eta momentuz ez da egon ezaugarri horretako eskaririk. Gordeta geratuko dira, beraz.
Guztira 275 eskari jaso ditu Udalak etxebizitza tasatuetarako. Ondarroan erroldatuko herritarrez gain, Mutrikun, Deban eta Lea-Artibaiko herrietan erroldatutakoek eduki dute aukera eskaria egiteko. Baldintza ekonomiko modura urteko gitxieneko diru sarrera ponderatua 9.000 euro eta gehienekoa 45.000 euro izatea ipini zuten, 2010eko urrian onartutako arautegian. Salmentako prezioa 186.000 eurokoa da, eta etxeen neurria 83 metro koadro erabilgarri, garajeagaz eta ganbaragaz.
Orain zotz egingo diren 34 etxebizitzak Kamiñaldeko aldean daude. Hauek dauden eraikin berean beste 36 babes ofizialeko etxe eta beste hamabi tasatu ere eraiki zituen Ondarroa Lantzen Udalaren sozietate publikoak, 2007ko udabarrian hasita. Eraikinak bederatzi atari dauzka San Inazio kalera begira; Zaldibia tailerraren hurrengo hirurak babes ofizialeko etxeenak dira, eta esleituta daude 2009tik; hurrengo lau atariak dira tasatutako etxebizitzenak.
Udal Kudeaketa Batzordeak Kamiñalde-Iturribarriko etxebizitza tasatuei hasiera batean 270.000 euroko salneurria ipini zien, 2008an. Zozketa epealdiak agortu be egin ziren, nahikoa eskari barik.
Gerora, barriz, prezioen moldaketa egin zuten, eta ekialdeko saileko 36 etxebizitza hauen prezioa 186.000 euroan ezarri.
