Nahiak beteta dator zelaira Aurrera Kirol Elkartea
Zuzendaritzan aldaketa nahikoa eginda, baina betiko konpromiso eta helburuekin hasiko du 2012-2013 futbol denboraldia Aurrera Kirol Elkarteak. Ilusioz datoz guztiak, mailaz maila gauzak ondo egiteko gogoz. Eta hori guzti hori futbol zelai barrituan ipiniko da, gainera, jokoan. Ekipazioa be barria izango da, aspaldiko nahia beteta, iazko denboraldian elkarteak izan zituen sarrerei esker. Desio bat baino gehiago be beteko du elkarteak: 91 urte beteta, estreinako, emakumeen taldea egongo da. Eta pauso bat gehiago emonda, Aurrera Futbol Eskola ipiniko da martxan, euren kirol gustukoenaz gozatu nahi duten neska-mutilei lekua emonaz. Futbol eskolaren berri emoteko, astelehenerako gurasoentzako batzarra deitu du Aurrerak, 19:30ean, Kofradia Zaharrean. Hantxe zabalduko dute ekimen barriaren gaineko informazio guztia. Zelaiko obrak amaitu bitartean, Markina-Xemeingo Barroeta futbol zelaian jokatuko dituzte talde guztiek etxeko partiduak. «Artibaik emondako laguntza eskertu nahi dugu, bihotzez», adierazi du Eladino Gonzalez Aurrerako lehendakariak. Nagusien ohorezko maila Gotzon Basarasek laneko kontuak tarteko entrenatzaile postua laga behar izanda, Mikel Aramaio Aristondok hartu du lehen taldearen ardura. Haritz Fernandez izango du bigarrena. Prestatzaile fisikoa Mikel Aramaio Basterretxea izango da, eta Iñaki Bedialauneta atezainena. Aurreko urteetan gertatu legez, jokalari askok laga dute taldea: Ander Laka Azkoitiko Anaitasunara joan da, Jon Burgoa eta Ruben Gabilondo Elgoibarrera; Ibai Aramaiok, bestalde, futbola laga du. [...]
Zuzendaritzan aldaketa nahikoa eginda, baina betiko konpromiso eta helburuekin hasiko du 2012-2013 futbol denboraldia Aurrera Kirol Elkarteak. Ilusioz datoz guztiak, mailaz maila gauzak ondo egiteko gogoz. Eta hori guzti hori futbol zelai barrituan ipiniko da, gainera, jokoan. Ekipazioa be barria izango da, aspaldiko nahia beteta, iazko denboraldian elkarteak izan zituen sarrerei esker.
Desio bat baino gehiago be beteko du elkarteak: 91 urte beteta, estreinako, emakumeen taldea egongo da. Eta pauso bat gehiago emonda, Aurrera Futbol Eskola ipiniko da martxan, euren kirol gustukoenaz gozatu nahi duten neska-mutilei lekua emonaz. Futbol eskolaren berri emoteko, astelehenerako gurasoentzako batzarra deitu du Aurrerak, 19:30ean, Kofradia Zaharrean. Hantxe zabalduko dute ekimen barriaren gaineko informazio guztia.
Zelaiko obrak amaitu bitartean, Markina-Xemeingo Barroeta futbol zelaian jokatuko dituzte talde guztiek etxeko partiduak. «Artibaik emondako laguntza eskertu nahi dugu, bihotzez», adierazi du Eladino Gonzalez Aurrerako lehendakariak.
Nagusien ohorezko maila
Gotzon Basarasek laneko kontuak tarteko entrenatzaile postua laga behar izanda, Mikel Aramaio Aristondok hartu du lehen taldearen ardura. Haritz Fernandez izango du bigarrena. Prestatzaile fisikoa Mikel Aramaio Basterretxea izango da, eta Iñaki Bedialauneta atezainena.
Aurreko urteetan gertatu legez, jokalari askok laga dute taldea: Ander Laka Azkoitiko Anaitasunara joan da, Jon Burgoa eta Ruben Gabilondo Elgoibarrera; Ibai Aramaiok, bestalde, futbola laga du. Taldea osatzeko, eta bere filosofiari jarraituta, Ondarroako jokalariez osatu du Aurrerak taldea. Premien arabera, Deba eta Markina-Xemeindik be ailegatu dira mutilak. Aldaketak aldaketa, talde gaztea, ilusioz betetakoa eta futbol ona egiteko gogoa daukana dauka Aurrerak. Horretarako, dena dela, gogor lan egin beharko dute, futbolaren kultura barneratu. «Serio hartzen badute, gauza politak egin dezakeen taldea da», esan du entrenatzaileak. Helburua argia da: taulan goi aldean ibiltzea, ezerri bizkarrik emon barik, baina itsutu barik.
Bisitari moduan partidu bat jokatuta, Aurrera 14. postuan dago. Touringen aurka gutxienekoagatik galdu zuten: 2-1.
- Asteburuko partidua: Aurrera-Aloña Mendi, domeka, 17:00, Barroeta (Markina-Xemein)
Gazteen ohorezko maila
Anton Martinez de Luco entrenatzailearen eskutik ariko da, aurten be, gazteen taldea. Talde gaztea edukiko du bere ardurapean, azkan urteko jokalari bakar bategaz. Momentu onak emoteko lako taldea da, polita, ilusioa sortzen duena, eta aurrerapausoa emonez gero, eta lanean aritu, aurrean egon daitekeena.
Lehiaketa, dena den, aldaketekin dator eurentzat: itzulera bikoitzean neurtuko dituzte indarrak, faserik barik. Hori horrela, indarrez atera beharko dute hasieratik, futbolean ondo jokatzeko gai direla sinistu eta era horretan emaitza onak lortzeko. Helburua hobetzen jarraitzea izango dute, eta mailaren sailkapen buruan egon nahi badute, gogotsu aritu beharko dute beharrean.
- Asteburuko partidua: Aloña Mendi-Aurrera, bihar, zapatua, 16:30, Azkoagain
Kadeteen ohorezko maila
Taldea afizionatu mailako Julen Uribesalgok eta Raul Louro eta Borja Solabarrieta gazteek zuzenduta egongo da. Talde gaztea edukiko dute esku artean, eta nahikoa motza jokalari kopuruari dagokionez. Ohorezko mailak asko eskatzen du, eta gogor lan egin beharko dute, pertsona modura ez eze, jokalari modura be hazteko. «Talde lanean aritzea beharrezkoa izango dute lehiakorrak izan nahi badute».
- Asteburuko partidua: Aurrera-Amaikak Bat, bihar, zapatua, 12:30, Barroeta (Markina–Xemein)
Kadeteen lehen maila
Aitor Solabarrieta entrenatzaile dela, zubilana egiten duen taldea izanik, jokalariek euren heziketagaz jarraitzea bilatuko dute, kirol elkartean jarraitze aldera. Apurka-apurka, lana eta esfortzua handitzea bilatuko du Aurrerak, lehiatzen hasi ahal izateko. Emaitzari uko egin barik, euren lehen helburua hezkuntza dela jakin beharko dute mutilek. Nahikoa talde murritzagaz hasiko du denboraldia Solabarrietak. Alboan, bigarren modura, Ibon Pazos edukiko du.
- Asteburuko partidua: Aurrera-Eibartarrak, domeka, 12:30, Barroeta (Markina-Xemein)
Txikiak, bi taldegaz
Urteka banatuta, txikien talde bi edukiko ditu Aurrerak. Hirugarren talde bat egotea ia ezinezkoa izango da, aurtengo denboraldia bermatu nahi bada.
Talde batean zein bestean iazko entrenatzaileek jarraituko dute: 1999 urtekoena Idoia Arantzamendi eta Mikel Santiso. 2000 urteko taldea Iraitz Prietok eta Jon Zabalak eroango dute. Kirol koordinatzailea, barriz, Imanol Osa izango da. Talde bien helburua pertsona eta talde mailan hobetzea izango da. Horretarako, jokalarien garapenean lan egingo da. «Eureak dira Aurrera moduko klub bat mantenduko dutenak. Eurak dira harrobia».
Nesken taldea, entrenatzen
Entrenamenduak hasita, jokalari gutxi xamar daude orain momentuan nesken taldean. «Seguru gazte gehiago sartuko direla, asko ziren-eta nesken taldea martxan hasteko gogoa zeukatenak», esan du Gonzalezek. Horregatik, Aurreran futbolean jokatu nahi duten neskek Zaldupera joan beharko dute, entrenamendu saioak noiz dauzkaten jakiteko. Amaia Fernandez eta Nerea Brenesek entrenatuko dute taldea. Zuzendaritzak taldeak denboraldi honetan lehiatzea desio du, eta hori lortzeko ahalegin guztiak egingo ditu.
