Jende gutxi baina giro ona Akerbeltzen 4. urtebetetze jaian
Akerbeltz gaztetxeak lau urte bete ditu, eta hori ospatzeko, egun osoko jaia egin zuten bertan gazteek. Markina-Xemeingo Gazte Asanbladaren 10. urteurreneko jaia orain dela hilabete izanik, oraingoan, «jai xume bat» antolatzea izan da gazteen asmoa. ...
Akerbeltz gaztetxeak lau urte bete ditu, eta hori ospatzeko, egun osoko jaia egin zuten bertan gazteek. Markina-Xemeingo Gazte Asanbladaren 10. urteurreneko jaia orain dela hilabete izanik, oraingoan, «jai xume bat» antolatzea izan da gazteen asmoa. Halan, etxeko giroan baina gustora, ospatu dute urtebetetzea.
Herriko Euskara Batzordeak eta XATek antolatutako Euskararen Eguneko Mihiluze jolasera batzeko deia egin zuten gazteek, baina, gutxi izan ziren horretara animatu zirenak. Gaztetxeko bazkarian be, aurreko urteetan baino jende gutxiago elkartu zen, 40 bat lagun, eta beraz, lagunartean, lasai, bazkaldu zuten danek.
Bazkalostean ailagatu zen sorpresa. Irrien Lagunek entsegua egin zuten gaztetxean, eta ikuskizunaz gozatu eta eurekin solasean aritzeko aukera izan zuten Akerbeltzen batutakoek.
Arratsaldea gaztetxean pasatuta, poteora irten ziren gazteak. Lasai hasi zen gaba, baina orduak aurrera joan ahala, gero eta jende gehiago batzen joan zen, eta Valentziako (herrialde katalanak) Atzenbla ska-rock taldearen kontzerturako nahiko jende pilatu zen gaztetxean. Talde gazte baina oso ona suertatu zen Atzenbla eta pozik geratu ziren bai taldekoak bai eta kontzertua entzutera joan zirenak be. Urtero modura, urteurren jaia karaokeagaz amaitu zen, eta betiko modura, arrakasta handia lortu zuen. Hasi orduko zegoen jada, zerrenda luzea parte hartzeko, eta horrela, kantatu eta kantatu, goizaldera arte luzatu zen jaia.
