Oinaztuek zeruan Z-ak marrazten dituzten antzera pasatuko dira autoak zapatuan Lea-Artibaiko bide bihurrietatik. Badator Lea-Artibaiko bigarren rallya, Kastinparro Racing taldearen eskutik.
Bihar egingo dute irteera ekitaldia, Markina-Xemeinen, baina egun handia zapatukoa izango da. Iazko moduan, aurten ere Ereñotik abiatuko da itzulia, eta Lea-Artibaiko herri gehienetatik pasatuko da, bost tartetan.
Ibilbideak 343 kilometro edukiko ditu, eta horietatik 93,78 izango dira kronometratuak. Guztira, bost tarte edukiko ditu probak, eta horietako bakoitza bi bider egin beharko dute parte hartzaileek.
Guztira, 53 autok parte hartuko dute Lea-Artibaiko rallyan, eta bertokoak zein kanpokoak izango dira parte hartzaileak.
53 parte hartzaile egongo dira Lea-Artibaiko rallyan; bertokoek zein kanpokoek parte hartuko dute.
Antolatzaileek aipamen berezia egin nahi izan diete Sergio eta Diego Vallejo anaiei: «Galiziatik datoz euren Porsche 911 GT3 Cup autoagaz». Espainiako txapelketan lehiatzen ari dira, eta 2009an Espainiako txapeldunak izan ziren. «Ohorea da horrelako pilotuak Lea-Artibaira etortzea», diote Kastinparrokoek.
Sari banaketa Etxebarriko frontoian egingo dute, zapatu iluntzean.
Bihar, irteera ekitadia
Markina-Xemeinen egingo dute bihar iluntzean irteera ekitaldia. Aurretik auto guztiak egiaztatuko dituzte, 15:00etatik 18:00etara, Etxebarriko Ibaun-erdi eta Altzibar auzoen arteko bidegorrian.
20:30ean hasiko da irteera ekitaldia, Markina-Xemeingo Goiko Portalean. Auto guztiak irteerako podiumetik pasatuko dira, eta han, autoak ikusteaz gain, auto, pilotu, kopilotu eta rallyari buruzko informazioa ere jasoko dute ikusleek. Goiko Portaleko podiumetik pasatu ostean, pilotu bakoitzak Zelaiaren azpiko aldera eroango du bere autoa, eta han egongo dira ibilgailuak, hurrengo egunera arte.
Begibistakoa da horrelako ekitaldi bat antolatzeak daukan lan karga itzela. «Urte osoko lana dago egun bitan pasatuko den rallyaren atzean», azaldu dute antolatzaileek. Aurten ere zaleen eta laguntzaileen beharra eskertu dute Kastinparrokoek. Bestetik, babesleek emandako diru laguntzak ere eskertu dituzte. «Oso pozik gaude emaitzagaz», esan dute.
Iaz, «esperientzia ona»
Lea-Artibaiko rallya iaz antolatu zuen lehenengoz Kastinparro Racing taldeak. Ordukoan, Xabier Lujua eta Jesus Estrada izan ziren irabazleak. Ander Aranak eta Arkaitz Kobeagak egin zuten bigarren, eta hirugarren Gorka Antxustegik eta Xabat Urrestik.
Iazko erantzuna «ona» izan zela diote antolatzaileek, jendea «harrituta» geratu zela «horrelako ikuskizuna» antolatzea lortu zutelako. «Egia esan, esker oneko ikuslegoa egon zen, eta jarrera bikaina erakutsi zuten babesle, laguntzaile eta parte hartzaile guztiek», diote Kastinparrokoek.
Aurten iazkoa errepikatzea eta iazkoak eduki zuen adinako harrera eta parte hartzea izatea dela helburua diote. «Gure nahia zaleak, pilotuak eta laguntzaileak gustura geratzea da, eta gu geu irribarrez eta lortu izanaren satisfakzioz», esan dute.
Bihar iluntzean hasiko da auto hotsa eskualdean, eta zapatu gauera arte jarraituko du.
Tarteak eta ordutegiak
TC1-3 Ereño-Ispaster
09:07an eta 11:45ean jokatuko da proba (errepidea itxita egongo da 08:00etatik 13:00etara, gutxi gorabehera). Iaz jokatu zen lehenengoz tarte horretan. Hasieran, errepide zabala eta asfalto onekoa, baina amaiera aldean ezkerretara bidegurutze bat dago, eta han guztiz aldatzen da. Oso konplikatua izatera pasatzen
da bapatean, estu eta irristakorra. Ikusleek gozatzeko tartea da lehenengo hori, eta denboretan alde ederrak ateratzeko egokia.
TC2-4 Mendexa-Berriatua-Ondarroa
p09:40an eta 12:18an jokatuko da proba (errepidea itxita egongo da 08:30etik 13:30era, gutxi gorabehera). Iaz berreskuratu zuten tartea. Autozaleek «xarma berezia» daukan errepidea dela diote, «ikusgarrienetakoa» delako. Mendexan irten, eta hasiera oso indartsua dauka tarteak, aldapa behera. Handik, kostako bide bihurgunetsu eta gorabeheratsua hartuko dute. Errepideak lur irregularra eta irristakorra dauka. Pilotuentzat nekagarria da, baina ikusleentzat ikusgarria.
TC5-8 Markina-Xemein-Aulesti
p15:01ean eta 17:49an jokatuko da proba (errepidea itxita egongo da 14:00etatik 19:00etara, gutxi gorabehera). Lekoizen hasi eta Aulestiraino izango da tartea. Hasierako 300 metroak aldats goran egingo dituzte autoek, eta beste guztiak aldats behera. Zoru oneko errepidea da, estua eta azkarra, baina oso gaiztoak diren bihurgune estuak ere badauzka ibilbideak. Pilotuek euren trebeziak erakusteko eta auto txikiek denbora ona egiteko tartea da.
TC6-9 Urrutxua-Munitibar-Ziortza-Bolibar
p15:36an eta 18:24an jokatuko da proba (errepidea itxita egongo da 14:30etik 19:30era, gutxi gorabehera). Rallyko tarterik luzeenetakoa da. Urrutxun hasiko da, Munitibartik pasatu eta Ziortza-Bolibarren amaitu. Bidea antzerakoa den arren, ikusleentzako toki politak dauzka. Errepidea ona eta zabala da. Hala ere, azken aurreko tartea izanda, gaua sar daiteke bigarren pasadarako. Postua mantentzen ahaleginduko dira.
TC7-10 Elgoibar-Etxebarria
p16:34an eta 19:22an jokatuko da proba (errepidea itxita egongo da 15:30etik 20:30era, gutxi gorabehera). San Migel Rallysprintaren omenezko tartea izango da hau. Tarte kuttuna da inguruko pilotuentzat. Hasieran aldats handia dauka, eta hurrengo kilometroak oso teknikoak dira. Errepide zabala eta ona da, baina gaitza ere bai. Jaitsiera bihurgunetsua eta konplikatua da, eta denbora ona egiteko ondo trazatu beharrekoa. Hau ere gauez egin beharko dute pilotuek.
