Neguko itxura hartuta, sardinatara ateratzen hasita daude arrantzaleak
Azken egunetan uraren tenperatura nahikoa jaitsi da, eta ura hotzituta, sardina hasi da ugaritzen. Atzo goizean, 10:30ak orduko, 29.800 kilo sardina zeuden salduta. Kiloak –hamabost garau hartzen zituen– prezio ona egin zuen, bai saltzaileentzat eta bai erosleentzat: bataz beste, 0,57 euro. Garestiena 0,77 eurotan eta merkeena 0,60 eurotan saldu zen.
Sardinak
Atzokoa aste osoko jardueraren isla izan zen: eguaztenean dozena bat txalupa joan ziren sardinatara, kostatik bost-sei ordura. Garesti saldu zen, bataz besteko 0,80 euroko prezioan. Gainerako itsasontziak kostatik hurre-hurre geratu ziren, txitxarrotan. Ondarroako Ongi Etorri eta Lekeitioko Ondarzabal eta Kalamu ez eze, getariarrak, hondarribitarrak eta kantauriarrak ere arrantzu bera ari dira egiten. Galiziarrak geldituta daude, eta hori igarri-igarria da inguruko portu guztietan. Bihar jaieguna izan arren, gaur sardinatara atera dira itsasontzi asko eta asko, eta bihar lan eguna izango dute kofradian.
