Emakumeen erabakitzeko eskubidea bermatuko duen lege baten alde agertu da Ondarroako Udala, aho batez. Mozioa Ondarroako Udal Berdintasun Kontseiluak eraman du udalbatzarrera, haurdunaldi bat borondatez etetea zilegitasun, ziurtasun eta legezko egoeran gauzatu behar dela eta Administrazioak emakumeek hartutako erabakia gauzatu dadin beharrezkoak diren neurriak hartu behar dituela iritzita.
Hartara, Ondarroako Udalak abortua Kode Zibilean arautzeko eskaria egin du, batetik, haurdunaldia borondatez eteteko, eta bestetik, emakumeek euren amatasunari buruz erabakitzeko. «Abortu eskubidea modu eraginkor eta ziurrean gauzatzeko beharrezko tresnak ziurtatu behar dira. Eskubide horren praktika, berriz, ezin da baldintzatu eta oztopatu», jaso du Udal Berdintasun Kontseiluak mozioan.
Osasun publikoko sarean
Hori modu egoki batean bideratu dadin, emakume guztientzat, bertako zein etorritakoentzat, abortua osasun publikoko sareko zerbitzu normalizatu bat izatearen premia dagoela nabarmendu dute, eta era berean, emakumeen abortatzeko eskubidea gune publiko guztietan bermatzeko kontzientzia-eragozpena arautzeko. «Bermea eskatzen dugu emakumeok gure eskubideak erabili ahal izateko eta profesionalek euren lana egin ahal izateko; hori inolako beldurrarazte eta lohitzerik barik, eskubide horren gauzatze askea oztopatzen eta kriminalizatzen dute eta».
Sexu eta ugalketa osasunari atxikitako politika eta neurriak gehitu daitezela. Hori da udal gobernuak onartu duen beste puntu bat, beti ere sexu eta ugalketa eskubideen onarpenean oinarrituta egonik. «Hezkuntzaren maila guztietan ezarri behar litzateke sexu eta afektu hezkuntza, beti ere, ikuspuntu feminista eta ez heteronormatibo batetik».
Azkenik, antisorgailuei buruzko informazioa eskuragarri egotea eta doakoa izatea jaso du mozioak. «Guk erabakitzen dugu nola bizi nahi ditugun gure identitate sexualak, plazerrak, desioak eta gure amatasuna».
Andrabanda Feminista, Boga Boga emakume elkarteak, Minbiziaren Aurkako Elkarteak, ONEk, Ondarroako Sarekonpontzaileak, 7 emakume en movimientok, UXU Ondarroako emakumeen taldeak, herriko alderdi politikoek, LAB sindikatuak eta banakoek osatzen dute Udal Berdintasun Kontseilua.
