Bilboko Instrukzioko 1. zenbakiko epaitegiak Santi Brouard lekeitiarraren hilketaren kasua artxibatu du. Justiziak ez du kasua ikertzen jarraitzeko arrazoirik ikusten, eta artxibatzea erabaki du, bigarren aldiz. Brouarden senideek froga berriak egiteko eskakizunari uko egin eta kasua artxibatzeko erabakia hartu zuen epaileak. Erabaki horren aurrean helegitea jarri zuen familiak. Epaileak hartutako erabakia berretsi du orain, Bizkaiko Audientziak.
Azken prozesua 2012ko azaroaren 12an hasi zen. Jose Amedo poliziaburu espainiar ohiak Luis Morcillo enpresariaren aurkako salaketa jarri zuen Bilboko Auzitegian Santi Brouard Herri Batasuneko Mahai Nazionaleko kidea hiltzea leporatuta, eta bideo bat aurkeztu zion epaileari. Amedoren arabera, grabazioetan, Morcillok Brouard hiltzea aitortzen zuen eta Julian Sancristobal Espainiako Segurtasun zuzendari ohia nahasten zuen. Froga berriak zeudela eta, Ana Isabel Gasca kasuko epaileak auzia berriro irekitzea erabaki zuen Brouarden hilketa aztertzeko.
Hala eta guztiz ere, kasuak Auzitegi Nazionalean jarraitu dezake. Jose Amedo polizia-komisario ohiak, salaketa bat jarri zuen Auzitegi Nazionalean Donibane Lohitzunen 1894ko uztailaren 10ean (Behe Nafarroa) La Consolation tabernaren kontra izandako atentatua berriro ikertzea eskatuz. Morcillok, atentatuaren egilea -Rafael Lopez Ocañarekin batera- zela onartu zuen. Atentatuan ETAko hiru kide zauritu zituzten, eta ekintza GALek aldarrikatu zuen.
Orain arte hiru epaiketa egin dituzte, baina, hala ere, ez da aurrerapausorik egon. Aurretik, Rafael Lopez Ocaña, hilketaren egileetako bat, bakarrik kondenatzea lortu zuten, eta ez zuten operazioaren burua nor izan zen argitzerik lortu.
