Andoni Aretxabaleta pilotari markinarra estreinako Eskuz Binakako Txapelketa jokatzen ari dela-eta, partidu bat bere herrira ekarri nahi izan du Markinako Esku Pilota Taldeak. Horrela, Markina-Xemeingo Udalagaz batera antolatuko dute
martxoaren 15ean, 17:15ean hasita, jokatuko den jardunaldia.
Joan den barikuan aurreratu zuen Asegarcek, twitter bidez, partidu bat Markina-Xemeinen jokatuko zela, eta martxoaren 15eko data baieztatu du Markina-Xemeingo Udalak.
Bi partidu jokatuko dira. Lehenengo partidua Idoate eta Apraiz eta Saralegi eta Ibai Zabalaren artekoa izango da. Bigarrenean jokatuko dute Olaizola II eta Aretxabaletak Titin III eta Merinoren kontra.
Partidua antolatzeak kostu handia dauka, hori dela eta, udalarekin adostasun batera ailegatu dira Markinako Esku Pilota Taldea eta udala. Horrela, udalak gastuak ordaintzen lagunduko dio taldeari, eta ordez, sarrerak merkeago jarriko dituzte. 20 eta 25 euro artean egongo dira.
