Segiko kide izatea egotzita Madrilen epaitzen ari diren 36 gazteen alegatua irakurri dute gaur eguerdian Lekeition. Azken hitza euskal herritarrei ematea erabaki dute epaituek, horrela, Gaizka Likona eta Zurine Gojenolaren lekua hartu dute Lekeition Felix Aizpurua eta Marijo Lekue lekeitiar bien irakasle ohiek.
Etorkizuneko zubiak eraiki beharraz jardun dute, “ilusio zubiak eta justizia zubiak” eraiki beharraz. Epaiketa garaiz eta lekuz kanpo dagoen anakronismoa dela esan dute; frustrazio eragilea, eta herritarrak ordea, ilusio desioz daudela “bakean eta justizian oinarrituko den etorkizuna erakikitzeko”. Egungo testuinguruan politikak eremu polizial eta juridikotik irten egin behar duela adierazi dute. “Justizia, garai berri baterako trantsizio ikuspegitik aplikatzen hasi behar da”.
Lekeition modura beste hainbat herritan ere gazteen ahotsa izan dira herritarrak. Halan, 40 herritarrek hartu dute 40 auzipetuen tokia.
Euskal Herriko hainbat esparrutako lagun ezagunek ere bat egin dute testuarekin. Gazteen azken alegatua sinatu duten zenbait pertsonaren artean daude Jesus Egiguren PSE-EEko presidentea, Txema Montero abokatua, Toti Martinez de Lezea idazlea, Xabier eta Miren Amuriza bertsolariak, Jose Luis Korta arraunlaria eta Alex Txikon mendizalea, besteak beste.
GEHIENGO BERRIAREN ADIERAZPENA, “GU” BERRIARENA
Zubiak eraiki nahi ditugu lehen harresiak zeuden lekuan. Gurea bando herria izan da. Identitatearen inguruko bateko eta bestekoena, ideologiaren araberakoena… eta garaile eta garaituena, “eurak” eta “gu”, betiro. Baliteke, oraindik ere, hala izatea neurri batean. Baina bi urteko prozesu demokratikoaren ostean, subjektu berri bat sortu da, “gu” berri bat; gu, bakean eta justizian oinarrituko den etorkizun berri baten alde egiten dugunak, konfrontazioa eremu politiko hutsera mugatuko den etorkizunaren jabe izan nahi dugunak; denok irabazle izango garen etorkizuna.
Etorkizunerako zubiak. Atzera begirako estrategia “antiterrorista”-ri lotzea herri honen etorkizunaren eraikuntzarako zama latza da. Eragile politiko eta sozial orok eman du urratsen bat denok batera ekin behar diogun etorkizuna eraikitzeko. Gehiago beharko dira, baina agerikoa da lekuz kanpo daudela konponbidea eten edo oztopatu asmoz eraikitzen dituzten harresi berriak, eta epaiketa hau horietako bat da, garrantzitsua gainera. Garaiz eta lekuz kanpo dagoen anakronismoa da.
Ilusio zubiak. Epaiketa hau, antzeko beste ekinbide batzuen antzera (edo estrategia beraren baitan egiten ez diren urratsen moduan) frustrazio eragile da. Herritarrok ilusio desioz gaude, ordea, bakean eta justizian oinarrituko den etorkizuna eraiki nahi dugu, errespetua eta aitorpena oinarri izango dituena.
Justizia zubiak. Bada arrazoibide eta tresna juridiko aski epaiketa honen emaitza bakearen aldeko urrats txiki bat izan dadin. Justizia, garai berri baterako trantsizio ikuspegitik aplikatzen hasi behar da. Gure aurkako epaiketan berez delitu ez diren ekimenak aurkeztu ditu akusazioak froga gisa, hala aitortu du, gainera; helburuak dituzte epaitzen, ez bitartekoak, jardun politikoa dute epaitzen eta ez delituak. Egungo testuinguruan, politikak irten egin behar du eremu polizial eta juridikotik.
Horregatik guztiagatik, adierazpen honetan prozesu judiziala bertan behera uztea eskatzen dugu, edo auzipetu denak absolbitzea edo egokien den modua, baina 40 gazte hauek libre nahi ditugu.
