Uhagon kulturguneak 320 bazkide ditu. Kopuru horrek, baina, gora egin dezakete aurten ere. Izan ere, deskontuek eta eskainitako arretak erakarrita, bazkidetzak egiten hasi zirenetik gehituz joan dira sozioak.
Uhagon Kultur Elkarteak kudeatzen du Markina-Xemeingo kulturguneko egitaraua, eta herriari zabalik egongo den gunea izatea dute asmoa hasieratik. Hori dela eta, bazkide egiteko aukera ideia ona zela behitandu zitzaien. Bi helburu ditu bazkidetza horrek: batetik, babes ekonomikoa edukitzea jarduerak antolatu ahal izateko; bestetik, Uhagon elkartekoentzat garrantzitsuena dena, jendearen babesa lortzea. Bazkide eginda, ikuskizunak eta ikastaroak merkeago dituzte herritarrek, eta ekitaldiei buruzko informazioa astero jasotzen dute etxean. Urtean 27 euro ordaindu behar dituzte, eta urtarrila izaten da altak eta bajak egiteko sasoia. Hala ere, urte osoan dago bazkide egiteko aukera. Hiru bide daude horretarako: Uhagoneko webgunean eskuragarri dagoen bidez fitxa bete eta bidaltzea, telefonoz deitzea edo kulturgunera bertara joatea.
Behin bazkide eginda, txartel bat jasoko du herritarrak, eta orduan hasiko da abantailez gozatzen. Egitarauari buruzko informazioa edo ekitaldi zehatzei buruzkoa astero jasoko du etxean, eta ikastaro eta ikuskizunetan eskaintza berezia izango du. Kontzertu, ikuskizun edo antzezlanak daude asteburuero Uhagonen. Gainera, kasturte osoa iraungo duten zortzi ikastaro daude Uhagonen, eta zenbait asteburutan puntualak egingo dituzte. Esaterako, asteburu honetan Lan Bila tailerra hartuko du kulturguneak, eta hurrengoan bi eguneko flamenco ikastaroa.
Markina-Xemeindik kanpo bizi arren ere egin daiteke bazkide; esaterako, Etxebarriko, Ziortza-Bolibarko, Ondarroako eta Lekeitioko bazkideak dauzka Uhagonek. Nahiz eta Uhagon Kultur Elkartea izan talde eragilea, funtzionatzeko orduan jendearen parte hartzea lortzean datza Uhagonen filosofiak. «Horregatik dira guretzat bazkideak horren garrantzitsuak». Hasteko dagoen film laburren lehiaketa ere herritarren ekimenez sortu dute; beraz, «ideia eta aukera berriei zabalik» daude. Gainera, bazkide ez direnek ere badaukate proposamenak egiteko aukera. «Herritarrei zabalik gaude; kulturagaz jakin-mina dutenei zabalik.
Bestalde, Egin zaitez bazkide lehiaketa antolatu du Uhagonek. Hala, hiru galdera zuzen erantzuten dituztenen artean 2014ko bazkide kuota eta 50 euroko saria zozkatuko ditu.
