Gipuzkoatik, Iparraldetik, Nafarroatik eta Arabatik igarota, Bizkaian sartuko da bihar Euskal Herriko 54. Itzulia. Gasteiztik Arratera bidean, Markina-Xemeingo Barinaga auzotik eta Etxebarritik pasatuko da tropela. Gaur berriz, 194,7 kilometroko etapa luzea dute aurretik txirrindulariek. Urdazubitik abiatuta, Nafarroaren zati handi bat zeharkatu beharko du tropelak, Araban sartu, Gaztela eta Leongo Trebiñu herritik pasa eta Gasteizera iristeko. 3. mailako bi eta 2. mailako beste bi mendate igaro beharko dituzte txirrindulariek helmugara heldu orduko.
Euskal Herriko Itzuliko lehen kilometroak egin dira, eta lasterketaren buru egoteko lehia bizia dago. Alberto Contador Tinkoff-Saxo taldeko txirrindularia garaile izan zen lehen etapan, Ordizian, Movistar taldeko Alejandro Valverde gainditu eta gero. Atzo lehiatu zen bigarren etapan, aldiz, Omega Pharma taldeko Tony Martinentzat izan zen garaipena.
Zazpi txirrindularik ihes egin zuten atzokoan: Gorka Izagirrek (MOV), Dupontek (ALM), Jungelsek (TFR), Malacarnek (EUC), T. Martinek eta Bakelantsek (OPQ), Monfortek (LTB). Baina, azkenean, Tony Martin bakarrik geratu zen aurrean, eta tropelak ezin izan zuen harrapatu.
Bestalde, sailkapenaren buruan dauden Alberto Contador eta Alejandro Valverde erasoan ibili ziren batak bestea atzean utzi nahian baina, ez zuten bestearen errubedarik galdu. Beraz, ez zen sailkapen nagusian aldaketa nabarmenik gertatu, eta Contadorrek lidergoan jarraitzen du.
Intxausti eta Txurruka
Hemeretzi talde eta 188 txirrindulari dabiltza Euskal Herriko Itzulian, euretatik hamar euskal txirrindulariak dira, eta tartean daude Beñat Intxausti Movistar Team taldeko txirrindulari muxikarra eta Amets Txurruka Caja Rural-Seguros RGA taldeko etxebarritarra. Movistar taldeko txirrindularia 32. postuan sailkatu zen lehen etapan eta 92. bigarrenean, Caja Ruralekoa aldiz, 65. eta 138. ailegatu da. Podiumera itzultzeko asmoagaz hasi du itzulia Intxaustik baina «oso saila» izango dela dio «aurkari asko eta oso onak daudelako». Podiuma Markina-Xemeingo erlojupekoan erabakiko dela uste du muxikarrak.
