Herriko berba edo esaeren inguruko lehiaketa antolatu dute Ziortza-Bolibarren
Herriko altxorrak izenburupean, Ziortza-Bolibarko Udaleko Euskara Batzordeak herriko berba edo esaeren inguruko lehiaketa ipini du martxan. “Gure herriko berba asko galtzen doazela ikusita antolatu dugu lehiaketa”, gaineratu dute. Lehiaketaren helburua galtzear dauden berba horiek berreskuratzea dela diote. “Berba horrek batu eta bizi gehiago ematen ahalegintzeko antolatu dugu lehiaketa”.
Herritarrek urtarrilaren 31ra arte aurkeztu ahal dituzte euren proposamenak. “Nork ez du entzun etxean aurretik inoiz entzun gabeko berbaren bat? Gutxi erabili edo sarri erabiltzen ez den eta asko gustatzen diren herriko berba bat ere aurkeztu ahal dute lehiaketara”.
Lehiaketan parte hartzea “erraz-erraza” dela diote antolatzaileek. “Herriko tabernetan edo udaletxean dauden paperak bete eta kutxetan sartzea baino ez da. Paperean berba edo esaera idatzi beharko dute herritarrek. Berba bat idazten badute, aldamenean euskara batuan zelan idazten den ipini beharko dute. Gero, jarraian, aukeratutako berba horrekin esaldi bat egin beharko dute”.
Herritarrei lehiaketan parte hartzeko deia egin diete euskara batzordeko kideek. “Animatu parte hartzera, saria zurea da!!! Gainera, zenbat eta paper gehiago bete, saria irabazteko orduan eta aukera gehiago edukiko dute!”.
Sariak. Guztira hiru sari banatuko dituzte: Lehenengo saria tablet bat izango da, bigarrena bi lagunentzako afari bat eta hirugarrena Mihiluze jolasa.
