Hezitzaile bat gehiago izango du Lekeitioko Aisialdi Zerbitzuak
Lekittoko Aisialdi Taldekoek dantzan eman diote amaiera 2014 urteari. Argazkia: Lekittoko Aisialdi Taldea
Premia bereziak dituzten umeei behar duten arreta eskaintzea da helburua. “Aniztasuna irizpide moduan, perfil ezberdinetako gazte guztiei parte hartzeko aukera eman nahi dio Udal Aisialdi Zerbitzuak eta jendartearen integrazioa bideratzeko baliagarri izatea du jomuga”, azaldu dute.
Urrian martxan hasi zen udal aisialdi zerbitzu berria arrakasta handia izaten ari da. 2013-2014 ikasturtean udal aisialdi zerbitzuaren gaineko hausnarketa prozesuari esker, haur eta gazteen nahi eta beharrizanen arabera antolatutako aisialdi zerbitzua eskaintzen hasi dira, eta haur eta gazteen partehartze handi hori horren islada dela uste dute.
Zazpi herritarrek osatu dute orain arte lantaldea, eta aurreikuspenak gainditu direnez, hurrengo egunetan beste begirale bat gehituko da. “Premia bereziak dituzten umeei gainerako umeen eskubide berdinak aitortu behar zaizkie”, azpimarratu dute.
Zerbitzua Aisialdi zerbitzua hiru zatitan banatzen da, adinaren arabera. Eskolapeko Limoneroetan dagoen ludotekan 3tik 5 urtera arteko umeak egoten dira; 6 urtetik 11 urtera arteko gaztetxoak Gazteguneko beheko solairuan eta 12 urtetik gorakoak Gazteguneko lehenengo solairuan. Ordutegiari dagokionez, ludoteka bariku eta zapatuetan egoten da 17:00etatik 20:00etara; 6 urtetatik 11 urtera artekoak, ostera, barikuan, zapatuan eta domekan elkartzen dira 17:00etatik 20:00etara, eta 12 urtetik gorakoak barikuan eta zapatuan 18:00etatik 23:00etara, eta domekan 18:00etatik 20:00etara.
