Erakusketan ikus daitezkeen argazkietariko batzuk
Etxelilakoa
Yolanda Eizagirre argazkilariak Ondarroan egiten duen bigarren argazki erakusketa da. Lehena, 2010ean Uxu emakume taldeak antolatuta egin zuen, eta oraingoan,
7 emakume en movimiento taldeak antolatuta. Aurreko esperientziagaz “oso gustura” geratu zela nabarmendu du argazkilari ondarrutarrak. “Nire argazkien erakusketa bat egitera animatuko nintzatekeen galdetu zidaten, eta baietz esan nien”, azaldu du Eizagirrek.
Denetara, 26 argazki ikus daitezke Etxelilako erakusketan. Gehienak 2014ko udazkenean ateratako argazkiak dira. Denetariko gaiak azaltzen dira argazkietan: Ondarroako kaleetako hainbat txoko eta paraje ezkutu, zaldiak, kalatxoriak, olatuak, itsasontziak, eta mendiko eta itsas giroko paisaiak.
Argazkietan, batez ere, Ondarroa eta bere inguruak agertzen dira. Beti ere, argiarekin jolasean eta xehetasunei erreparatzen aritu da ondarrutarra. “Argazkietan toki baten plano orokor bat erakutsi beharrean, gauza zehatzetan fokatu ditut. Xehetasunetan arreta jartzea nahiago izaten dut”.
Erakusketan, gainera, kalatxori, olatu eta zaldi ugariren argazkiak agertzen dira. “Kalatxoriekin obsesio txiki bat dut. Kalatxoriak itsasoko arratoiak direla esaten dute batzuek. Niri, ostera, asko gustatzen zaizkit. Olatuak ere oso gogoko ditut. Olatuak dauden tokian hantxe nago ni. Horrez gain, zaldiei argazkiak ateratzea ere oso gustuko dut. Zaldiei buruzko argazki asko ditut. Goimendia parean, esaterako, orduak egoten naiz zaldiei begira”.
Argazkien tamainuari eta koloreari dagokionez, gehienak 20×25 zentimetroko tamaina dute eta koloretakoak dira. Hala ere, tartean tarteko, argazki handiagoak eta txikiagoak edota zuri-beltzekoak ere aurki ditzake erakusketara hurbiltzen den bisitariak.
Erakusketa urtarrilaren 31 arte zabalik dago; martitzenetik domekara 16:30etik 20:30era.