Mutrikuko Zine Forum Taldekoek urteko lehen filma proiektatuko dute domekan
Mutrikuko Zine Forum taldeko kideek iragarri dutenez, urtarriletik ekainera bitartean, hilean “gutxienez” filma bat proiektatzeko asmoa dute. Urteko lehen filmaren emanaldia, gainera, berritasun eta guzti dator. Mutrikuko Zine Forum Taldeko kideen erabakiz, filmak barikuetan ordez, domeketan proiektatuko dira. “Proba modura egitea pentsatu dugu. Jende gutxi etorriko balitz, betiko proiekzio egunera bueltatuko ginateke. Orain, ikusi egin beharko da jendearen erantzuna”, azaldu dute zine forumekoek.
Domekan, Zabiel kultur etxean jarri dute hitzordua. 19:00etatik aurrera proiektatuko da filma, eta antolatzaileek aurreratu dutenez, “pelikula ezaguna” izango da. “Hurrengo egunotan jarriko ditugu Mutrikuko kaleetan pelikula iragartzen dituzten kartelak”.
Filma emanaldia, gainera, beti bezala doan izango dela gogorarazi dute zine forum taldekoek. Herritar guztiak proiekzioa ikustera gonbidatu dituzte. Horrez gain, taldean bertan parte hartu nahi duenari ere ateak irekita dituztela azaldu dute. “Oso jende gutxi gara Mutrikuko Zine Forum Taldean. Zinea gustuko duen edonor gure taldean parte hartzera gonbidatu nahiko genuke”.
